काठमाडौं—चिकित्सा शिक्षा सुधारको माग राख्दैं २१ दिनदेखि आमरण अनशनमा रहेका प्रा.डा. गोविन्द केसीको स्वास्थ्य अवस्था बिग्रिएको छ । त्रिवि शिक्षण अस्पतालमा अनशनरत डा. केसीको स्वास्थ्य बिग्रिएपछि आइतबार उनलाई अक्सिजन सपोर्ट दिइएको छ ।
‘झण्डै आधा घण्टा अघिदेखि उहाँलाई नाकबाट अक्सिजन सपोर्ट दिइएको छ,’ डा. केसीसँगै रहेकी डा. तोषिमा कार्कीले भनिन्, ‘बेलामा-बेलामा उहाँको मुटु असन्तुलित बनिरहेको छ । श्वास फेर्न गाह्रो परिरहेको छ ।’
उनकाअनुसार लामो समयको अनशनका कारण शरीरका सबै आवश्यक तत्वहरु कम भएकाले डा. केसीमा जिउ बाँउडिने, चक्कर लाग्ने, छाती दुख्नेजस्ता समस्या देखिएका छन् । ‘अरु औषधि लिन मान्नुभएको छैन्,’ उनले भनिन् ।
रोग प्रतिरोधात्मक क्षमता कम भएको र इन्फेक्सनको जोखिम बढेका कारण आजदेखि डा. केसीसँगका पब्लिक भेटघाट निषेध गरिएको छ । डा. केसीलाई भेट्न चाहनेहरुका लागि बाहिर एउटै फाइल बनाइएको र त्यही सन्देश दिन सक्ने व्यवस्था मिलाइएको डा. कार्कीले बताइन् ।
डा. केसीको यो १९ औं अनशन हो । चिकित्सा शिक्षा र अन्य स्वास्थ्य सुधारका माग राख्दैं उनले २१ दिनअघि जुम्लाबाट अनशन सुरु गरेका थिए । अनशनको नवौ दिन काठमाडौं आएका डा. केसीसँग सरकारले वार्ताका लागि कुनै पहल अगाडि बढाएको छैन ।
यसअघिका विभिन्न अनशनका क्रममा सरकारले डा. केसीका माग पूरा गर्ने सहमति गरेपनि त्यसको कार्यन्वयनमा तत्परता देखाएको छैन ।
