काठमाडौं–स्वास्थ्य तथा जनसंख्या मन्त्रालयले कोभिड—१९ को महामारीका बेला अस्पतालहरुमा चुस्त सेवा प्रवाह गर्नका लागि मन्त्रालयका तीन महाशाखा प्रमुखहरुलाई अधिकारसहितको जिम्मेवारी दिएको छ । अस्पतालका कोभिड वेडहरुको व्यवस्थापन गर्ने, त्यहाँ कार्यरत कर्मचारीको आवश्यकताअनुसार थपघट गर्नेदेखि प्राथमिक उपचार नदिने अस्पताललाई कार्वाहीको सिफारिससम्मको अधिकार दिएको छ ।
मन्त्रालयले नीति योजना तथा अनुगमन महाशाखा प्रमुख डा. गुणराज लोहनीलाई कोभिड—१९ उपचार गर्न मन्त्रालयसँग सम्झौता गरेका निजी तथा सामुदायिक अस्पताल, वीर अस्पताल, पाटन अस्पताल, किष्ट मेडिकल कलेज, केएमसी मेडिकल कलेज र नेपाल मेडिकल कलेजको सम्पूर्ण व्यवस्था हेर्ने जिम्मेवारी दिएको छ ।
त्यसैगरी, समन्वय महाशाखाका प्रमुख डा. जागेश्वर गौतमलाई थापाथलीस्थित प्रसुति गृह, त्रिवि शिक्षण अस्पताल, प्रहरी अस्पताल र वीरेन्द्र सैनिक अस्पतालको जिम्मा दिइएको छ । त्यसैगरी, गुणस्तर मापन महाशाखा प्रमुख डा. विकास देवकोटालाई कान्ति बाल अस्पताल, धुलिखेल अस्पताल, निजामती अस्पताल र कोभिड—१९ को उपचारमा मन्त्रालयसँग सम्झौता नगरेका निजी अस्पतालहरु जिम्मा दिइएको छ ।
तीनै महाशाखाका प्रमुखहरुलाई अस्पतालबाट प्रदान भइरहेका सेवा चुस्त—दुरुस्त बनाउने, सेवाको गुणस्तर नियमन गर्ने र आइपर्ने समस्याको तत्काल समाधान गर्ने, अस्पतालको समग्र व्यवस्थापनमा मन्त्रालयबाट प्रत्यक्ष निगरानी गर्ने कार्यविभाजन छ्ट्याइएको मन्त्रालयका प्रवक्ता डा. जागेश्वर गौतमले बताए ।
मन्त्रालयको नियमित प्रेस विफ्रिङमा डा. गौतमले तीनै जनालाई सम्बन्धित अस्पतालको कोभिड वेड संख्या, हाइ डिपेन्डेन्स वेड र आईसीयुको तथ्यांक अध्यावधि गर्ने, नियमित समन्वय गर्ने र आवश्यकताअनुसार मन्त्रालयको तर्फबाट व्यवस्थापनमा सम्झौता गर्ने अधिकार दिइएको बताए । त्यसैगरी, सम्बन्धित अस्पतालको आवश्यकताअनुसार जनशक्ति थपघट गर्ने, आवश्यक औषधि उपकरणका लागि व्यवस्थापन तथा मन्त्रालयमा सिफारिस गर्नेसमेत अधिकार दिइएको छ ।
त्यस्तै, अस्पताललाई आवश्यक आर्थिक सहयोगको सिफारिस गर्ने, कोभिड र नन कोभिड बिरामीको व्यवस्थापन गर्ने र प्राथमिक उपचार नगर्ने अस्पताललाई कार्वाहीको सिफारिससम्मको गर्ने अधिकार दिइएको उनले जानकारी दिए ।
