काठमाडौं—नेपाल स्त्री तथा प्रसुती रोग विशेषज्ञ समाज (नेसोग)को १७ औं कार्यसमितिबाट अध्यक्षमा प्रा.डा. गणेश दंगाल चयन भएका छन् । समाजको बरिष्ठ उपाध्यक्ष रहेका उनी स्वतः अध्यक्ष भएका छन् ।
समाजको विधानमा बरिष्ठ उपाध्यक्ष निर्वाचित व्यक्ति अर्को कार्यकालको स्वतः अध्यक्ष हुने प्रावधान छ । यस्तै, भावि अध्यक्षका लागि समाजको बरिष्ठ उपाध्यक्षमा डा. सरोजा कार्की पाण्डे विजयी भएकी छन् । बिहीबार भएको निर्वाचनमा उनले प्रतिद्वन्द्वी डा. गेहनाथ बराललाई १ सय २३ मतान्तरले पराजित गर्दै बरिष्ठ उपाध्यक्षमा निर्वाचित भएकी हुन् ।
डा. बरालले १५१ मत प्राप्त गरे भने डा. पाण्डेले २७४ मत प्राप्त गरिन् । यस्तै, समाजको उपाध्यक्षमा डा. पदमराज पन्त विजयी भए । पन्तले २७० मत प्राप्त गरे भने उनका प्रतिद्वन्द्वी डा. चन्दा श्रीवास्तवले १६० मत ल्याइन् ।
यस्तै, महासचिवमा डा. यमप्रसाद द्वा र सहमहासचिवमा डा. सपना (अमात्य) वैद्य निर्विरोध निर्वाचित भए ।
सामाजिक, सांस्कृतिक वैज्ञानिक सचिवमा डा. स्मृति मास्के, सामाजिक सांस्कृतिक वैज्ञानिक सह—सचविमा डा. ऋजुता जोशी, कोषाध्यक्षमा डा. सन्देश पौडेल र सह—कोषाध्यक्षमा डा. ज्योत्सना शर्मा पनि निर्विरोध भए ।
कार्यसमितिका ६ जना सदस्यहरुमा क्रमसः डा. अतित पौडेल, डा. आश्मा श्रेष्ठ, डा. कीर्तिपाल सुवेदी, डा. श्रीप्रसाद अधिकारी, डा. पुजा पौडेल र डा. स्निग्धा राई निर्विरोध चयन भए ।
समाजका कार्यसमितिका लागि अनलाइनमार्फत मतदान भएको थियो । निर्वाचन समितिकाअनुसार ७७ प्रतिशत मतदान भएको थियो । समाजमा मतदाता संख्या ५६४ छ ।
