काठमाडौं– स्वास्थ्य तथा जनसंख्या मन्त्रालयले प्रदेश तथा स्थानीय तहमा समायोजन भइ रमाना लिन बाँकी रहेका स्वास्थ्य सेवाका कर्मचारीलाई हाल कार्यरत कार्यलयमै कामकाजमा खटाउन समयावधि थप गरेको छ ।
कोभिड–१९ को महामारी सुरु भएपछि कात्तिक मसान्तसम्म रमाना नलिएका स्वास्थ्यकर्मीहरुलाई साबिककै तह तथा कार्यालयमा काम गराउने निर्णय गरेको थियो ।
मन्त्रालयले २८ कात्तिकमा सचिव स्तरीय निर्णय गर्दै कोभिड अवधिभर रमाना नदिई काम लगाउन सातै प्रदेश र सबै स्थानीय तहलाई पत्रचार गरेको हो ।
सो निर्णयसँगै अस्पतालमा कार्यरत अन्यत्र समायोजन भएका स्वास्थ्यकर्मीलाई पनि कोभिड अवधिभर रमना नदिई साविक अस्पतालमा कामकाज लगाइ तलब भुक्तानी गर्न भनिएको छ ।
त्यस्तै यस अघि कोभिड–१९ रोकथाम, नियन्त्रण र उपचारका लागि कामकाजमा खटिएका कर्मचारीलाई पनि तलब भुक्तानी गर्ने सचिव स्तरीय निर्णय भएको छ । मन्त्रालयले गरेको निर्णयमा मन्त्रालयले खटाइएकाको हकमा पनि सोहि अनुसार हुने र प्रदेश तथा स्थानीय तहमा समायोजन भइ रमना लिइ आएका स्वास्थ्य सेवाका कर्मचारीलाई सम्बन्धित निकायले अनिवार्य हाजिर गराइ कामकाजमा लगाउने उल्लेख छ ।
