विराटनगर—मोरङको बूढीगंगा गाउँपालिकाले पाँच शैय्याको अस्थायी कोभिड अस्पताल संचालनमा ल्याएको छ । कोरोना संक्रमतिको उपचारको लागि गाउँपालिकाले आइतबारदेखि कोभिड अस्पताल संचालनमा ल्याएको हो ।
बुढीगंगा–३ स्थित कमलावती–गोवर्धन दास स्वास्थ्य चौकी भवनमा गाउँपालिकाका अध्यक्ष बालचन्द्र माझीले कोभिड अस्पतालको उद्घाटन गरेका छन् । नेपाल सरकारले सुरू गरेको ‘एक स्थानीय तह, एक कोभिड अस्पताल’ को अवधारणा अन्तर्गत गाउँपालिकाले अक्सिजन समेतको व्यवस्था गरी कोभिड अस्पताल सुरू गरेको हो ।
संघीय सरकारबाट अनुदान प्राप्त १० लाख रूपैयाँले अस्पतालका लागि आवश्यक औषधि र बेड खरिद गरिएको प्रमुख प्रशासकीय अधिकृत डम्बरूबल्लभ बरालले बताए । प्रदेश १ को राजधानी रहेको सहर विराटनगर महानगरपालिकासँग सिमा जोडिएको यो गाउँपालिका संक्रमितको संख्या उच्च छ । गाउँपालिका भित्रका संक्रमितको कोभिड अस्पतालमा राखेर उपचार गरिने उनले बताए । पछिल्लो समय संक्रमितको संख्या बढदै गएकोले गाउँपालिकाको अस्पताललाई १० बेडसम्ममा विस्तार गर्न तयारी पनि सुरू गरिने बताइएको छ ।
गाउँपालिका जनस्वास्थ्य शाखा प्रमुख बासुदेव रेग्मीले हालसम्म गाउँपालिकामा चार सय जनामा कोरोनाको संक्रमण पुष्टि भएको र पाँच जनाको मृत्यु भइसकेको जानकारी दिए । होम आइसोलेसनमा बस्न नसक्ने मध्यम खालको लक्षण भएका संक्रमितहरूले कोभिड अस्पतालमा ल्याएर उपचार गरिने उनले बताए ।
कोभिड अस्पतालमा बिरामीको उपचारको लागि एक जना चिकित्सक र दुई जना स्टाफ नर्स करारमा गाउँपालिकाले नियुक्त गरेको छ ।
