काठमाडौं—स्वास्थ्य तथा जनसंख्या मन्त्रालयले स्वास्थ्य सेवा विभाग अन्तर्गतका प्रमुख महाशाखाका हाकिम (निर्देशक)हरुको जिम्मेवारी हेरफेर गरेको छ । १ पुसमा मन्त्रीस्तरीय निर्णय गर्दै मन्त्रालयले तीन जना निर्देशकको जिम्मेवारी हेरफेर गरेको हो ।
जिम्मेवारी हेरफेर हुनेहरुमा व्यवस्थापन महाशाखाका प्रमुख डा. रमेश खरेल, परिवार कल्याण महाशाखाका प्रमुख डा. भीमसिंह तिंकरी र उपचारात्मक महाशाखाका प्रमुख डा. तारा पोखरेल रहेका छन् ।
डा. खरेललाई उपचारात्मक महाशाखामा लगिएको छ । उपचारात्मक महाशाखाका प्रमुख डा. पोखरेललाई परिवार कल्याण महाशाखामा लगिएको छ भने परिवार कल्याण महाशाखाका प्रमुख डा. तिंकरीलाई व्यवस्थापन महाशाखाको जिम्मेवारी दिइएको मन्त्रालयका कर्मचारी प्रशासन महाशाखा प्रमुख दामोदर रेग्मीले हेल्थआवाजलाई बताए ।
त्यसैगरी, मन्त्रालयले विभागको महत्वपूर्ण मानिने आपूर्ति व्यवस्थापन शाखाको जिम्मेवारीमा रहेका चुडामणि भण्डारीलाई राष्ट्रिय तालिम केन्द्रमा पठाएको छ । मन्त्रालयमा रहेका उपेन्द्र ढुंगानालाई स्वास्थ्य सेवा विभागमा जिम्मेवारी तोकिएको छ ।
