विराटनगर—सुनसरीको धरानस्थित विपी कोइराला स्वास्थ्य विज्ञान प्रतिष्ठानको गेट अगाडिका ल्यावहरूले मनपरी शुल्क लिएर क्षयरोग भए÷नभएको पत्ता लगाउन गरिने परीक्षण ‘एडीए’ जाँचमा ठगी गर्ने गरेको पाइएको छ ।
यहाँ रहेको ल्याबैपिच्छे फरक मूल्य लिएर बिरामीका आफन्तसँग ठगी गर्ने गरेको भेटिएको हो । ल्याबहरुको मूल्यमा एक रूपता नहुँदा बिरामीहरू मर्कामा परेका छन् । मूल्यमा एकरूपता नहुँदा विपी प्रतिष्ठानको गेट अगाडिको ल्याबहरुले तोकिएको मनपरी शुल्क तिर्न बिरामीका आफन्त बाध्य भएका छन् । बिर्तामोड डाइग्नोष्टिक सेन्टर पोलिक्लिनिकले एडीए जाँचमा २ हजार ५ सय र सप्तकोशी डाइग्नोष्टिक सेन्टरले एक हजार ५० रुपैयाँ लिएको पाइएको छ । विपी प्रतिष्ठानभित्र एडीएको जाँच नहुने भएपछि बाहिरका ल्याव सेन्टरले मनोमानी शुल्क लिने गरेको हो ।
जसका कारणले बिरामी तथा बिरामीका आफन्तहरू कति शुल्क तिर्नुपर्ने हो भन्ने अन्योलमा पर्ने गरेका छन् । मोरङ उर्लावारी नगरपालिका–२ का चन्द्रबहादुर बरालले ‘एडीए’को जाँच गराउँदा दुवै ल्याव सेण्टरमा फरक—फरक शुल्क लिएको बताए । सप्तकोशीले भन्दा १४ सय ५० रुपैयाँ बढी लिएको उनले बताए ।
बरालको मिर्गौलामा समस्या भएर प्रतिष्ठानमा पुस २३ गते भर्ना भएका थिए । छातीमा पानी जमेपछि चिकित्सकले ‘एडीए’ जाँच गर्न भनेका थिए । सोहीअनुरूप प्रतिष्ठान भित्र परीक्षण नहुने भएपछि क्याम्प गेटका ल्याव सेन्टरमा पुग्दा फरक–फरक शुल्क लिएको बिरामीका भाइ रेवत बरालले बताए ।
एडीएले क्षयरोग भए नभएको पत्ता लगाउँछ । रेवतले पहिलो पटक सप्तकोशी डाइनोष्टिक सेन्टरबाट १ हजार ५० रुपैयाँमा एडीए परीक्षण गरेको भएपनि पुनः परीक्षण गर्दा बिर्तामोडले २५ सय रुपैयाँ लिएको बताए । ‘यहाँका ल्याबै पिच्छे एडीएको परीक्षणको फरक—फरक मूल्य रहेको पाइयो,’ उनले भने, ‘फरक–फरक मूल्य कायम गर्दा बिरामीका आफन्तलाई मार परेको छ ।’ ल्याबले लिने मनपरी शुल्कको विषयमा नियमकारी निकायले अनुगमन गरी शुल्कमा एकरूपता कायम गरिनुपर्ने बिरामीका आफन्तहरुको माग रहेको छ ।
बिर्तामोडका सञ्चालक नरेन्द्र देवले आफूहरूले लकडाउनका बेला महंगो मूल्यमा ‘एडीएको रिएजेण्ट’ ल्याएकाले २५ सय रुपैयाँ लिएको बताए । ‘मोटरसाइकलमा काँकडभिट्टा पठाएर भारतबाट रिएजेण्ट ल्यायौं, त्यो बेला महँगो थियो,’ उनले भने, ‘त्यही भएर अलिक मंहगो हुन पुग्यो ।’
