विराटनगर–उपचार गरेको शुल्क तिर्न नसकेपछि विराटनगरस्थित गोल्डेन अस्पतालले मोरङको एक जना वृद्धा महिलाको शव रोकेर राखेको छ । बिहीबार विहान उपचारको क्रममा मृत्यु भएकी मोरङको कानेपोखरी गाउँपालिका–१ होक्लाबारीकी ७० वर्षीया सानमाया मगरको शव अस्पतालले तोकेको रुपैयाँ बुझाउन नसक्दा शव लैजान नदिएको मृतकका आफन्तको गुनासो छ ।
गोल्डेनमा आठ दिन उपचार गरेको मगर परिवारले १ लाख ७८ हजार रुपैयाँमध्ये अस्पतालले १ लाख ५० हजार रुपैयाँ बुझाउन भनेको छ । आर्थिक अवस्था नाजुक भएको मगर परिवारमा उपचार खर्च तिर्न नसक्दा वृद्ध महिलाको शव अस्पतालमै रहेकोले आफन्तले अन्तिम संस्कार गर्न पाएका छैनन् ।
अस्पतालले भनेजति पैसा तिर्न नसकेपछि गोल्डेन अस्पतालले शव लैजान नदिएको मृतकका छिमेकी विनोद माझीले बताए । पेट दुख्ने समस्या भएपछि गत बुधबार मगरलाई गोल्डन अस्पताल ल्याइएको थियो । उनलाई लिएर श्रीमान ८० वर्षीय बलबहादुर मगर आएका छन् । ग्रामीण बस्तीमा बस्दै आएका मृतक र उनका श्रीमान दैनिक ज्याला मजदुरी गरेर गुजारा चलाउने गर्दछन् ।
‘आर्थिक अवस्था नाजुक भएका वृद्धा दम्पती हुन् । अस्पताल आउँदा प्रराम्भिक चरणमा १७ हजार रुपैयाँ बुझाएका रहेछन्,’ छिमेकी माझीले भने, ‘अहिले उहाँहरूसँग पैसा पनि छैन । हामीले चन्दा संकलन गरेर ७०–८० हजार रुपैयाँ जम्मा गरेका छौं । चन्दा संकलन गरेर १ लाख रुपैयाँ अस्पताललाई बुझाउने भन्दा पनि हस्पिटलले मानिरहेको छैन ।’ अस्पतालले १ लाख ५० हजार दिनुपर्ने अडान कायम गरेको उनले बताए । ‘ शव लैजान हामीले पनि चन्दा संकलन गरेका थियौ । उठेको जति पैसा दिएर अन्तिम संस्कार गर्न शव लैजान्छौं भन्दा अहिले हस्पिटल शव लैजान दिइरहेको छैन,’ उनले भने । गोल्डेनले वृद्धा महिलाको शव बन्धक बनाएर राखेको उनको भनाइ छ ।
मृतकका श्रीमान बलबहादुर मगरले पैसा तिर्नसक्ने क्षमता आपूmहरुको नभएको र शव लैजान अस्पतालले नदिँदा श्रीमतीको अन्तिम संस्कार गर्न नपाएको गुनासो गरे । उनले गोल्डेन अस्पतालमा भौतारिदै आफूसँग उपचार शुल्क तिर्नसक्ने अवस्था नभएकोले शव लैजान दिन गोल्डेन अस्पताल प्रशासनसँग हारगुहार गरिररहेका छन् ।
गोल्डेन अस्पतालका प्रशासकीय अधिकृत सन्तोष मेहताले २८ हजारभन्दा बढी छुट गरिदिइसकेकोले यसभन्दा बढी छुट दिन सक्ने अवस्था नरहेको बताए । ‘हाम्रो पनि धेरै खर्च हुने गरेको छ,’ उनले भने, ‘विपन्न भएर हामीले दिनसक्ने छुट दिएका छौं । यो भन्दा बढी छुट दिनसक्ने अवस्था छैन ।’
