विदेशी चिकित्सकको दर्ता व्यवस्थामा कुनै परिवर्तन भएकाे छैन : मेडिकल काउन्सिल

काठमाडौँ – नेपाल मेडिकल काउन्सिलले विदेशी चिकित्सकलाई पनि नेपाली चिकित्सक सरह मान्यता दिने व्यवस्थामा कुनै परिवर्तन नभएको जनाएको छ । विदेशी चिकित्सकलाई नेपालमा काम गर्न पाउने गरी ऐन नियमावली संसोधन भएको भन्दै  विरोध भएपछि काउन्सिलले एक वक्तव्य जारी गरी सो कुरा प्रष्ट पारेको हो ।

‘स्वास्थ्य र परराष्ट्र मन्त्रालयको सहमति र सहभागितामा नेपाल मेडिकल काउन्सिल र भारतीय आयुर्विज्ञान परिषदबीच चिकित्सकको उपाधीको आपसी मान्यताको विषय दुबै देशका प्रधानमन्त्रीहरूको रोहवरमा भएको समझदारी अनुसार नेमेकाको २०७६ कात्तिक ५ गतेको पूर्ण बैठकले निर्णय गरी कामकारबाही अगाडी बढेको छ , ‘वक्तव्यमा भनिएको छ ।  उक्त प्रक्रियाका लागि भारतीय पक्षबाट प्रस्तावित परीक्षाको प्रावधान राखिएको र सो व्यवस्थाले विदेशी चिकित्सकको नेपालमा दर्ता तथा अभ्यासको व्यवस्थामा कुनै परिवर्तन नगरेको काउन्सिलले जनाएको छ  ।

काउन्सिलका अनुसार यस्तो परीक्षा भारतीय पक्षबाट प्रस्तावित प्रावधान राखिएको र पूर्वयोग्यताको लागि मात्र प्रयोग हुने र परीक्षामा सफल उम्मेदवारहरु स्वत दर्ता नहुने व्यवस्था ऐन तथा नियमावलीमा स्पष्ट उल्लेख गरिएको छ ।