वीर अस्पतालको सेवा गुणस्तरीय बनाउनेमा सरकार प्रतिवद्ध : प्रधानमन्त्री देउवा

काठमाडौँ – प्रधानमन्त्री शेरबहादुर देउवाले  वीर अस्पतालको सेवा गुणस्तरीय बनाउन सरकार प्रतिवद्ध रहेको बताएका छन् । बिहिबार अस्पताल परिसरमा आयोजित अस्पतालको १ सय ३३ औं वार्षिकोत्सव कार्यक्रममा बोल्दै प्रधानमन्त्री देउवाले स्वास्थ्य क्षेत्रमा सरकार संवेदनशील रहेको हुँदा अस्पतालको सेवा गुणस्तरीय बनाउन सरकार प्रतिवद्ध रहेको बताएका हुन् ।

‘स्वास्थ्य क्षेत्रमा सरकार संवेदनशील छ। वीर अस्पतालले बढीभन्दा बढी जनतालाई सेवा दिनेछ भन्नेमा दृढ विश्वास लिएको छु। सरकारले पनि यसमा सक्दो सहयोग गर्नेछ,’ उनले भने।

प्रधानमन्त्री देउवाले दुवाकोटमा वीर अस्पतालको विस्तार हुने बताउँदै यसको लागि बजेट छुट्याउन र अस्पतालमा जनशक्ति थप्न स्वास्थ्यमन्त्री भावनी खापुङलाई निर्देशन दिएका छन्। गुणस्तरीय स्वास्थ्य सेवा नागरिकको आवश्यकता रहेको उल्लेख गर्दै प्रधानमन्त्री देउवाले दुर्गममा पनि स्वास्थ्य सेवा पु-याउन सरकार प्रयत्नशील रहेको बताएका छन्।

अस्पतालले क्यान्सरलगायतका घातक रोग उपचार सेवामा ध्यान दिनुपर्ने देखिएको उनको भनाइ छ।