प्रदेश १ का मुख्यमन्त्री राजेन्द्र राईलाई कोभिड-१९ संक्रमण

विराटनगर—प्रदेश १ का मुख्यमन्त्री राजेन्द्रकुमार राईलाई कोभिड-१९ संक्रमण भएएको छ । सोमबार स्वाब परीक्षण गर्दा मुख्यमन्त्री राईसहित अन्य दुई जनालाई कोभिड-१९ संक्रमण पुष्टि भएको मुख्यमन्त्रीका प्रेस सल्लाहकार बन्धु पोखरेलले जानकारी दिए ।

मुख्यमन्त्री राईसहित उनका परिवारका सदस्यहरू, सचिवालयका सदस्यहरू, निवासका सुरक्षाकर्मी, कर्मचारीलगायत गरी १६ जनाको स्वाब परीक्षण गरिएको थियो । पीसीआर परीक्षण गर्दा मुख्यमन्त्रीसहित पत्नी शोभा पाठक र मुख्यमन्त्रीका राजनीतिक सल्लाहकार जीवन राईलाई समेत संक्रमण पुष्टि भएको हो ।

मुख्यमन्त्रीसहित तीनै जनाको स्वास्थ्य अवस्था अहिले सामान्य रहेको छ । कोभिड-१९ संक्रमणका कारण मुख्यमन्त्रीको भेटघाटलगायत सबै कार्यक्रम हाललाई स्थगित गरिएको प्रेस सल्लाहकार पोखरेलले जानकारी दिए ।