मेयर साम्पाङले भने, ‘सरकारले चलाउन नसके वीपी प्रतिष्ठान हामी चलाउछौँ’

काठमाडौँ – धरानका मेयर हर्क साम्पाङले धरानस्थित वीपी कोइराला स्वास्थ्य विज्ञान प्रतिष्ठान सरकारले चलाउन नसके स्थानीय सरकारलाई सुम्पिदिन अनुरोध गरेका छन्। मेयर साम्पाङले आफ्नो सामाजिक संजाल फेसबुकमार्फत स्वास्थ्यमन्त्री भवानी प्रसाद खापुङसंगको भेटमा सो अनुरोध गरेको जानकारी दिएका हुन्।

उनले लेखेका छन्, ‘वीपी अस्पताल केन्द्र सरकारले चलाउन सक्दैन भने स्थानीय सरकारलाई सुम्पिदिनु हामी चलाउँछौँ भनेको छु । छिटो निर्णय गरियोस्।’ प्रतिष्ठानको स्वास्थ्य सेवा र व्यवस्थापन अस्तव्यस्त बनेको अवस्थालाई मध्यनजर गर्दै मेयर साम्पाङले सो माग राखेका हुन्।

हाल प्रतिष्ठानमा आर्थिक अनियमितता र स्वास्थ्य सेवा लथालिङ अवस्थामा रहेको सरकारले गठन गरेको अध्ययन प्रतिवेदनले देखाएको छ ।प्रतिष्ठानका रजिष्ट्रार सुर्य संग्रौलाले जारी गरेको श्वेतपत्रमा  प्रतिष्ठानको ऋण मात्रै १ अर्ब ४१ करोड रहेको उल्लेख छ ।