आँखा उपचारका लागि त्रिवि शिक्षण अस्पताल लगिएका कैदी फरार

काठमाडौं—आँखाका उपचारका लागि महारागन्जस्थित त्रिवि शिक्षण अस्पताल लगिएका कैदी फरार भएका छन् । बुधबार ४ बजेदेखि सवा ४ बजेकोबीचमा ललितपुरस्थित नख्खु कारागारमा कैद सजाय भुक्तान गरिरहेका रामेछापका भोला बुढाथोकी फरार भएका हुन् ।

‘उहाँको आँखामा केही बिझेकाले समस्या आएको थियो । पटक—पटक उपचार गर्नुपर्छ भनेकाले हामीले फ्लोअपका लागि लिएर गएका थियौं,’ नख्खु कारागारका प्रमुख सुवास लामिछानेले भने, ‘आज ४ देखि सवा चार बजेको बीचमा भागेको भन्ने खबर आएको छ ।’

उपचारका क्रममा एक हातमा मात्रै हत्कडी लगाएर भित्र पठाएको मौका छोपेर उनी फरार भएका थिए । कारागार प्रमुख लामिछानेकाअनुसार अहिले भोलाको खोजी कार्य जारी रहेको छ ।

२८ देखि ३० वर्ष उमेरका भोला कर्तव्य ज्यान मुद्धामा सजाय भोगिरहेका छन् । रामेछाप कारागारबाट उनलाई ०७२ सालमा नख्खु कारागारमा सारिएको थियो ।