काठमाडौं—प्रधानमन्त्री पुष्पकमल दाहालले सरकारी अस्पतालको स्तर खस्किएकोमा चासो व्यक्त गरेका छन् । सिंहदरबारमा सोमबार र मंगलबार सचिवहरुलाई निर्देशन दिदैं प्रधानमन्त्रीले सरकारी अस्पताल र सामुदायिक विद्यालयको गुणस्तर खस्किनुको कारण खोज्नुपर्ने बताएका छन् ।
सचिवहरुलाई दिइएको ३० बुँदे निर्देशनको एउटा बुँदामा प्रधानमन्त्री दाहालले भनेका छन्, ‘संघीयतासँग आधारभूत तहको शिक्षा र स्वास्थ्यको जिम्मेवारी स्थानीय तहलाई सुम्पिएको छ। तर, सरकारी अस्पताल र सामुदायिक विद्यालयमा शिक्षाको स्तर किन खस्कियो र यसको निराकरण के हो भन्ने खोजी गर्नैपर्छ ।’
उनले अर्को बुँदामा सीमान्तकृत, श्रमजीवी र समाजको तल्लो वर्गलाई आधारभूत स्वास्थ्य सेवामा राहत दिने उद्देश्यले ल्याइएको १ लाख रुपैयाँको स्वास्थ्य बिमा र विपन्नलाई कडा रोग लागेमा १ लाख रुपैयाँसम्म निःशुल्क उपचार गराउँदा प्रक्रियागत झन्झटले बिरामीले सहुलियत उपभोग गर्न नपाई रकमको अभावमा ज्यानसमेत जाने गरेको गुनासो आएको उल्लेख गरेका छन् । ‘विपन्न नागरिकलाई सरल ढंगले उक्त सहुलियत दिने जिम्मेवारी तपाईहरूको हो,’ प्रधानमन्त्री दाहालले भनेका छन्, ‘तर किन अस्पतालमा नाम दर्ता गराउन र बिमा सुविधा लिनका लागि लाइनमै बिरामीका दिन जान्छ ।’ उनले प्रविधिको यति धेरै विकास भइसक्दा सरकारी अस्पतालमा नामदर्ता गर्नसमेत मान्छेहरूको घण्टौं लाग्छ र सरकारी अस्पतालमा सामान्य शल्यचिकित्सा गराउन ३—४ महिना कुर्नुपर्ने कारणबारे पनि प्रश्न उठाएका छन् ।
‘अस्पतालका प्रयोगशाला र परीक्षण गर्ने मेसिन उपकरण पटकपटक बिग्रिन्छन् र बिग्रेपछि महिनौं बन्दैनन्,’ उनले सरकारी अस्पतालमा टड्कारो प्रश्नका रुपमा उठ्ने गरेको प्रश्न उठाउँदैं भनेका छन्, ‘अनुदानमा दिएका सामग्री स्टोरमा महिनौं थन्किन्छन् र चलनचल्तीमा भएका सामग्री पनि छिट्टै बिग्रिन्छन् । यसको खोजी गरी हटाउने जिम्मेवारी तपाई हामीले लिनुपर्छ ।’
यस्तै, प्रधानमन्त्री दाहालले सरकारी अस्पतालमा बिरामीको उपचार गर्नका लागि लाग्नुपर्ने लाइन एक महिनाभित्र हटाउन र त्यो नहटाए पदाधिकारीलाई दण्डित गर्ने बताएका छन् ।
चीन, जापानलगायतका देशहरुमा कोभिड—१९ को संक्रमण पुनः वृद्धि भइरहेका बेला दाहालले बुस्टर खोपको व्यवस्था गर्न पनि सचिवहरुको बैठकमा स्वास्थ्य मन्त्रालयलाई निर्देशन दिए । ‘हाल कोभिड-१९ को संक्रमण पुनः क्रमसः बढ्न लागेको प्रकाशमा आएको,’ उनले भनेका छन्, ‘जनस्तरमा कोरोना फैलिन नदिन आवश्यक निरोधात्मक र प्रवर्धनात्मक कार्यहरु गर्ने । बुष्टर डोज खोपको लागि कोरोनाको भ्याक्सिनको तत्काल प्रबन्ध स्वास्थ्य मन्त्रालयले गर्नुहोला ।’