काठमाडौं—नेपाल मेडिकल काउन्सिलले चिकित्सक आचारसंहिता पालनामा कडाइ गर्न थालेको छ । २६ फागुनमा बसेको काउन्सिलको पूर्ण बैठकले आचारसंहिता विपरित काम गरेको भन्दैं दुई जना चिकित्सकलाई निलम्ब गरेको छ भने पाँच जना चिकित्सकलाई अन्तिम चेतावनी दिएको छ ।
काउन्सिलले नेपाल मेडिसिटी अस्पतालका वरिष्ठ ग्यास्ट्रो सर्जन डा. सुनिलकुमार शर्मा र सोही विभागका रजिष्ट्रार डा. राजिव मिश्रलाई एक साता निलम्बन गर्ने निर्णय गरेको छ । डा. शर्मा र डा. मिश्रले २५ जेठ २०७९ मा मृत्यु भएका पोखराका योगेन्द्रबहादुर बस्नेतको उपचार लापरवाही गरेको निष्कर्ष निकाल्दैं दुवैलाई एक साता निलम्बन गर्ने निर्णय गरेको हो । उनीहरु विरुद्ध योगेन्द्रको परिवारले काउन्सिलमा उजुरी गरेको थियो ।
नेपाल मेडिकल कलेज जोरपाटीका शल्यचिकित्सक डा. रामेश्वरप्रसाद पोखरेल, डा. जस्मिना बज्राचार्य र डा. जेमेस सिंह महर्जनलाई सर्जिकल चेकलिष्ट अक्षरस पालना गर्न काउन्सिलले निर्देशन दिएको छ । उनीहरुले एपेन्डिसाइटिस भएका बिरामीको शल्यक्रिया गर्दा प्रयोग गरिएको ‘पेन रोज’ बिरामीकै शरीरमा छाडेपछि बिरामीमा पटक—पटक संक्रमण भएपछि पुनः शल्यक्रिया गर्नुपरेको थियो । त्यसपछि बिरामी पक्ष डाक्टरले शल्यक्रियामा लापरवाही गरेको भन्दैं काउन्सिलमा उजुरी हालेका थिए । उक्त उजुरीमाथि छानविन गर्दा डा. पोखरेल, डा. बज्राचार्य र डा. महर्जनको कमजोरी भेटिएपछि उनीहरुलाई काउन्सिलले अन्तिम चेतावनी दिएको हो ।
यस्तै, काठमाडौं मेडिकल कलेजका चिकित्सक डा. अमित थापालाई गुड क्लिनिक प्रायक्टिस गाइडलाइन पालना गर्न निर्देशन दिने निर्णय काउन्सिलले गरेको छ । उनका विरुद्धमा काठमाडौं मेडिकल कलेजमा उपचारका लागि आएका ४८ वर्षीय शैलेन्द्रराज विद्याधरको उपचार लापरवाही गरेको भनी उजुरी परेको थियो ।
महाराजगन्जस्थित अन्तर्राष्ट्रिय बालमैत्री अस्पतालका संचालकसमेत रहेका डा. शान्तचन्द्र शाक्यलाई पनि काउन्सिलले व्यवसायिक आचरण पालना गर्न अन्तिम चेतावनी दिएको छ । उनलाई चिकित्सकीय आचारसंहिता तथा प्रेस्क्रीप्सन तालिम लिन र त्यसको प्रमाण पेश गर्न निर्देशन दिएको छ । डा. शाक्य विरुद्ध बालबालिकालाई जुनसुकै रोगमा पनि एकै प्रकार औषधि चलाउने गरेको उजुरी काउन्सिलमा परेको थियो ।
