काठमाडौं—कोभिड—१९ का बेला संचालनमा आएको चर्चित ‘ए’ ग्रेडको विद्य ल्याब बन्द भएको छ । ललितपुरस्थित विद्य ल्याब निकट स्रोतकाअनुसार आर्थिक संकटमा परेपछि व्यवस्थापनले माघबाटै ल्याब बन्द गरेको हो ।
विद्य ल्याबका प्रमुख भीम भण्डारीले पनि ल्याब बन्द भएको पुष्टि गरे । ‘१५—२० यता ल्याब बन्द छ,’ उनले भने । ल्याब बन्द हुनुको कारणबारे प्रश्न गर्दा भने उनले अब अर्को ठाउँमा सारेर संचालनमा ल्याउन लागिएको दावी गरे ।
भण्डारीले १५—२० दिन यता ल्याब बन्द भएको बताएपनि विद्य ल्याब माघबाटैं बन्द भएको हो । ल्याबले २०७७ माघमा ‘ए’ ग्रेडको अनुमति पाएको थियो ।
कोभिड—१९ का बेला नै अनुमति नलिएर पोखरामा शाखा संचालन गरेपछि विद्य ल्याब विवादमा तानिएको थियो ।
३ असार २०७९ मा अख्तियार दुरुपयोग आयोगले संचालक भण्डारी विरुद्ध ६ करोड २४ लाख ४ हजार रुपैयाँ गैरकानुनी सम्पत्ति आर्जन गरेको आरोपमा विशेष अदालतमा भ्रष्टाचार मुद्धा दायर गरेको थियो । त्यसपछि विद्य ल्याब पनि क्रमसः आर्थिक संकटमा पर्दै गएको. थियो ।
