महावीर पुनको आन्दोलनलाई डा. गोविन्द केसीको पनि समर्थन

काठमाडौं—वैज्ञानिक महावीर पुनले नवप्रवर्तनमा जोड दिनुपर्नेलगायत माग राख्दैं सुरु गरेको आन्दोलनमा डा. गोविन्द केसीले पनि ऐक्यवद्धता जनाएका छन् । आइतबार डा. केसी माइतीघरस्थित पुनले आन्दोलन सुरु गरेको ठाउँमा पुगेर ऐक्यवद्धता जनाएका हुन् ।

पुनले आविष्कार र नवप्रवर्तनका लागि हरेक वर्ष बजेटको १ प्रतिशत रकम छुट्याउनुपर्ने, अनुसन्धान, नवप्रवर्तन र आविष्कार प्रवरद्धन, संचालन तथा खरिद ऐन बनाउनुपर्ने, स्टार्ट अपहरुलाई प्रोत्साहन गर्ने कानुन बनाउनुपर्ने, नवउद्यमीहरुलाई हतोत्साहन गर्नुपर्नेलगायतमा माग राखेका छन् ।

गत शुक्रबारदेखि पुन र उनका समर्थकहरु राती पनि सडकमै बास बसेर माइतीघरमा आन्दोलन गरिरहेका छन् । आन्दोलन सुरु गर्नुअघि पुनले प्रधानमन्त्री पुष्पकमल दाहाललाई पनि भेटेर आन्दोलनबारे जानकारी गराएका थिए ।