काठमाडौं—नवनियुक्त स्वास्थ्य तथा जनसंख्या मन्त्रीमा मोहनबहादुर बस्नेतको पद तथा गोपनीयताको सपथ आज हुने भएको छ । बिहीबार राष्ट्रपति कार्यलयमा स्वास्थ्य मन्त्री बस्नेतसहित नवनियुक्त अन्य दुई जना मन्त्रीको सपथ हुनेछ ।
बुधबार प्रधानमन्त्री पुष्पकमल दाहालले नवौं पटक मन्त्रिपरिषद् विस्तार गर्दै बस्नेतलाई स्वास्थ्यमन्त्रीमा नियुक्त गरेका थिए ।
बस्नेत सिन्धुपाल्चोचक—२ बाट प्रतिनिधीसभामा निर्वाचित सांसद हुन् । उनी नेपाली कांग्रेसभित्र पार्टी सभापति शेरबहादुर देउवा निकट मानिन्छन् ।
को हुन् नवनियुक्त स्वास्थ्यमन्त्री बस्नेत ?
०३४ सालदेखि नेविसंघको हुँदैं राजनीतिमा आएका बस्नेत वि.सं. २०४८ सालमै सिन्धुपाल्चोक-१ मा उम्मेदवार बनेका थिए । वि.सं. २०५६ सालमा सिन्धुपाल्चोक १ मा एमाले उम्मेदवार अमृत बोहरालाई पराजित गर्दै संसद प्रवेश गरेका उनी वि.सं. २०५८ सालमा स्वास्थ्य राज्यमन्त्री भएका थिए ।
वि.सं. २०६४ सालमा पहिलो संविधानसभा सोही क्षेत्रबाट पराजित उनी दोस्रो संविधानसभा निर्वाचनमा एमाले उम्मेदवार अरुण नेपाललाई ३२ मतले हराउँदैं संविधानसभा सदस्य निर्वाचित भए ।
वि.सं. २०७४ मा सूचना तथा संचारमन्त्री बनेका उनी ०७९ मंसिरमा भएको प्रतिनिधीसभा निर्वाचनमा सिन्धुपाल्चोक २ बाट एमाले उम्मेदवार पूर्व स्वास्थ्यमन्त्री शेरबहादुर तामाङलाई पराजित गरेका हुन् ।
बस्नेत वि.सं. २०१५ सालमा सिन्धुपाल्चोकको बाह्रबिसे—६ मा जन्मिएका हुन् । उनले राजनीतिकशास्त्र र समाजशास्त्रमा स्नातकोत्तर गरेका छ्न ।
