काठमाडौं—स्वास्थ्य तथा जनसंख्यामन्त्री मोहनबहादुर बस्नेतको तीन तहका अस्पतालहरुको उपचारात्मक सेवा तथा साधन स्रोतको अवस्था अनुगमन गर्नका लागि अतिरिक्त स्वास्थ्य सचिवको नेतृत्वमा समिति गठन गरेका थिए । समितिलाई एक हप्ताको समायावधि दिएर प्रतिवेदन पेश गर्न भनिएको थियो ।
सो समितिको एक हप्ताको अवधिमा कान्ति बाल अस्पताल र परोपकार प्रसुति गृहको मात्रै अनुगमन गरेको छ । दुई ठूला केन्द्रीय अस्पतालको भने दुई वर्षअघि गरिएको इक्वीपमेन्ट अडिट रिपोर्टलाई आधार मानेर प्रतिवेदन बुझाउने तयारी गरेको छ ।
समितिका संयोजक डा. विकास देवकोटाले आफूहरुलाई दिइएको समयभन्दा एक दिन अगाडि नै प्रतिवेदन तयार पारिसकेको बताए । ‘हामीलाई दिइएको एक दिन अगावै प्रतिवेदन तयार पारिसकेका छौं,’ डा. देवकाटाले भने, ‘समय कम भएको हुँदा संघीय अस्पतालको मात्रै रिपोर्ट समेटिएको छ । प्रदेश र स्थानीय तहका अस्पतालहरुको रिपोर्ट माग गरेका छौं ।’
समितिका एक सदस्यकाअनुसार कोभिड—१९ का बेला ल्याइएका आईसीयु, एचडियु र भेन्टिलेटर प्रयोग नभएको, उपकरणहरु ल्याएर थन्काइएको, बिग्रिएका उपकरणहरु मर्मत नगरेकोलगायतका समस्या अनुगमनका क्रममा पाइएका थिए । ‘कान्ति अस्पतालको स्टोर व्यवस्थापनमा धेरै नै समस्या रहेको देखियो,’ ती सदस्यले भने, ‘थापाथलीको समग्रमा सन्तोषजनक अवस्था छ ।’
स्वास्थ्यमन्त्री बस्नेले पहिलो निर्णयका रुपमा २१ बैशाखमा स्वास्थ्य सेवा प्रवाहका लागि संघ, प्रदेश र स्थानीय तहहरुमा रहेका अस्पतालहरु भइरहेको उपचारात्मक सेवा र उपलब्ध साधन स्रोत, औजार उपकरणको अत्याधिक उपभोग भए नभएको समेत समग्र क्षेत्रको अनुगमन गरी प्रतिवेदन पेश अतिरिक्त स्वास्थ्य सचिवको नेतृत्वमा अनुगमन समिति गठन गर्ने निर्णय गरेका थिए ।
उक्त समितिमा नीति, योजना तथा अनुगमन महाशाखा प्रमुख, गुणस्तर मापन तथा नियमन महाशाखा प्रमुख, प्रशासन महाशाखा प्रमुख, आयुर्वेद तथा वैकल्पिक चिकित्सा विभागका महानिर्देशक, उपचारात्मक महाशाखाका निर्देशक, व्यवस्थापन महाशाखाका निर्देशक र नर्सिङ तथा सामाजिक सुरक्षा महाशाखा निर्देशक सदस्य छन् । समितिको सदस्यसचिवमा भने मन्त्रालयको अनुगमन तथा मुल्यांकन शाखा शाखा प्रमुख डा. गुणानिधी शर्मा छन् ।
