काठमाडौं—मीनभवनस्थित सिभिल सर्विस अस्पतालले एक आर्थिक वर्षमा १० करोड ५० लाख रुपैयाँ छुट दिएको छ । अस्पतालले कर्मचारी, पूर्व कर्मचारी र कर्मचारीका परिवारलाई १० करोड ५० लाख रुपैयाँ बराबरको छुट सुविधा उपलब्ध गराएको हो ।
अस्पतालका कार्यकारी निर्देशक डा. विधाननिधी पौडेलकाअनुसार अस्पतालले गत आर्थिक वर्षमा अस्पताल भएको सेवा प्रवाहमा १० करोड ५० लाख रुपैयाँ छुट दिएको हो । ‘हामीले गत आर्थिक वर्षमा अस्पतालबाट प्रदान हुने सेवामा १० करोड ५० लाख छुट दिएका छौं,’ उनले भने ।
अस्पतालले अधिकृत र त्यसभन्दा उच्च तहका कर्मचारीलाई उपचार तथा अन्य परीक्षण सेवामा ४० प्रतिशत छुट दिदैं आएको छ । अधिकृतभन्दा तल्लो तहका कर्मचारीले भने अस्पतालबाट उपचार सेवामा ५० प्रतिशत छुट पाउँदैं आएका छन् ।
अस्पताल प्रशासनकाअनुसार रिटायर्ड कर्मचारीले पनि सेवामा ५० प्रतिशत छुट पाइरहेका छन् । अस्पतालले कर्मचारीका परिवारलाई पनि सेवामा छुट दिदैं आएको छ ।
दैनिक ८ सयदेखि १२ सयजनासम्म बिरामीलाई ओपीडी सेवा दिदैं आएको अस्पताल काठमाडौंका ठूला प्रमुख सरकारी अस्पतालमध्येमा पर्छ । अस्पतालमा अहिले १३२ शैय्या संचालनमा रहेको छ । असारभित्र अस्पताललाई स्तरोन्नती गरेर ३०० शैय्या संचालनमा ल्याउने तयारी अस्पतालले गरिरहेको छ ।
यसबाहेक एमआरआई सेवा, रेडियोथेरापी सेवा अस्पतालले सुरु गर्ने तयारी अन्तिम चरणमा पु¥याएको छ भने हेमोडाइलाइसिस सेवाका लागि पहल भइरहेको डा. पौडेलले बताए ।
