काठमाडौं—दादुरा संक्रमणबाट १६ जिल्ला प्रभावित भएका छन् । परिवार कल्याण महाशाखाकाअनुसार शनिबारसम्म देशभरका १६ जिल्लामा दादुराको प्रकोप फैलिएको छ ।
जसमा कोशी प्रदेशका दुई जिल्ला मोरङ र सुनसरी, मधेश प्रदेशका तीन जिल्ला धनुषा, महोत्तरी र सर्लाही, बागमती प्रदेशका दुई जिल्ला चितवन र काठमाडौंमा दादुराको प्रकोप देखिएको छ । यसैगरी, लुम्बिनी प्रदेशका पाँच जिल्ला कपिलवस्तु, अर्घाखाँची, दाङ, बाँके, बर्दिया, कर्णाली प्रदेशको एक जिल्ला सुर्खेत र सुदूरपश्चिम प्रदेशका तीन जिल्ला कैलाली, कन्चनपुर र बाजुरा दादुराका कारण प्रभावित भएका छन् ।
महाशाखाकाअनुसार यी जिल्लामा १००३ जना बिरामी भेटिएका छन् । जसमध्ये बाँकेमा १ जनाको दादुराका कारणबाट मृत्यु भएको छ ।
बाँके जिल्ला, कैलाली, सुनसरी र महोत्तरी बढी प्रभावित बालबालिकालाई दादुराको खोप लगाइएको महाशाखाले जनाएको छ । महाशाखाकाअनुसार यही आर्थिक वर्षभित्र दादुरा प्रकोपबाट प्रभावित ९ जिल्ला मोरङ, सुनसरी, महोत्तरी, दाङ, बर्दिया, सुर्खेत, कैलाली, कन्चनपुर र बाजुरामा दादुराको खोप अभियान संचालन गरेर १६ लाख ८१ हजार ८५१ बालबालिकालाई खोप लगाइनेछ ।
यस्तै, दादुरा देखिएको काठमाडौंको गोकर्णेश्वर नगरपालिका ९ मा पनि खोप अभियान सुरु गर्ने तयारी महाशाखाले गरेको छ ।
