काठमाडौं—सरकारले एक वर्षमा छात्रवृत्तिअन्र्तगत पढेका चिकित्सक तथा स्वास्थ्यकर्मी परिचालन गरेवापत ५७ करोड ९१ लाखभन्दा बढी रुपैयाँ तलब भुक्तानी गर्नुपर्ने भएको छ । सो रकम स्वास्थ्य तथा जनसंख्या मन्त्रालयले दुई चरण निकासा दिइसकेको छ भने तेस्रो तथा अन्तिम निकासाको तयारीमा छ ।
स्वास्थ्य मन्त्रालयले छात्रवृत्ति करारमा खटाएका चिकित्सक तथा स्वास्थ्यकर्मीका लागि ४६ करोड ३३ लाख ५९ हजार रुपैयाँ निकासा दिइसकेको छ भने थप २५ करोड ७० लाख ८० हजार रुपैयाँ निकासाका लागि अर्थ मन्त्रालय पठाएको छ ।
मन्त्रालयले पहिलो चरणमा २५ करोड ५ लाख १५ हजार रुपैयाँ निकासा गरेको थियो । दोस्रो चरणमा थप २१ करोड २८ लाख ४४ हजार रुपैयाँ छात्रवृत्ति करारमा खटिएका चिकित्सक नर्स र स्वास्थ्यकर्मीका लागि निकासा गरेको मन्त्रालय स्रोतले जनाएको छ ।
पहिलो चरणमा केन्द्रीय अस्पतालमा खटिएका छात्रवृत्ति करारका चिकित्सकलाई ५ करोड ८२ लाख १४ हजार रुपैयाँ, प्रदेशतर्फ १९ करोड १ हजार १ लाख रुपैयाँ र स्थानीय तहमा २२ लाख रुपैयाँ निकासा गरेको थियो ।
दोस्रो चरणमा संघीय अस्पतालमा खटिएकाको तलब भत्ताका लागि ७ करोड ९१ हजार रुपैयाँ, प्रदेशतर्फ खटिएकाका लागि १३ करोड ११ लाख ८९ हजार रुपैयाँ र स्थानीय तहमा खटिएका छात्रवृत्ति करारका चिकित्सक तथा स्वास्थ्यकर्मीका लागि १ करोड १५ लाख ६४ हजार रुपैयाँ निकासा गरिएको थियो ।
पहिलो र दोस्रो किस्ताबाट नपुगेको थप १२ करोड ५८ लाख १० हजार रुपैयाँ निकासा सहमतिका लागि अर्थमा प्रस्ताव पठाइएको स्वास्थ्य मन्त्रालयले जनाएको छ ।
जसमा संघीय अस्पतालका लागि ८५ लाख ६१ हजार रुपैयाँ, प्रदेशका लागि ६ करोड ७८ लाख ३ हजार रुपैयाँ, स्थानीय तहका लागि ३ करोड २८ लाख ८१ हजार रुपैयाँ र स्वास्थ्य सेवा विभागअन्तर्गत ६० लाख रुपैयाँ, देवदह नगरपालिकालाई ४ लाख १५ हजार रुपैयाँ र केन्द्रीय कारागार अस्पतालका लागि १ लाख ५० हजार निकासा स्वीकृतिका लागि अर्थसँग माग गरेको छ ।
