काठमाडौं—तीन महिनादेखिको तलब नपाएपछि चितवनको भरतपुरस्थित विपी कोइराला मेमोरियल क्यान्सर अस्पतालका कर्मचारी आन्दोलित भएका छन् । बुधबार अस्पतालका कर्मचारीहरुले तलब नपाएको भन्दैं दबाब दिन केहीबेर प्रशासनमा घेराउ गरेका छन् ।
अस्पतालका तत्कालीन कार्यकारी निर्देशक डा. डेजकुमार गौतमको कार्यकाल २४ बैशाखमा सकिएको थियो । तर, नयाँ कार्यकारी निर्देशक नियुक्त नहुँदा कर्मचारीले बैशाखदेखि तलब पाएका छैनन् ।
‘तीन—तीन महिना तलब रोकिदा घर व्यवहारमा समेत समस्या भइसक्यो,’ अस्पतालका एक कर्मचारीले भने, ‘फार्मेसीमा औषधि खरिद हुन सकेको छैन । बिरामीलाई पनि उतिकै समस्या छ ।’
प्रधानमन्त्री पुष्पकमल दाहाल रस्वास्थ्य तथा जनसंख्यामन्त्री मोहनबहादुर बस्नेतबीचको टसलका कारण विपी कोइराला मेमोरियल क्यान्सर अस्पताल, भरतपुरमा अस्पताल विकास समिति गठन सम्बन्धी फाइल एक महिनादेखि क्याबिनेटमा थन्किएको पाइएको छ । मन्त्री बस्नेतले एक महिनाअघि नै भरतपुर क्यान्सर अस्पताल विकास समिति गठनका लागि ६ सदस्य नियुक्तिको सिफारिससहितको फाइल क्याबिनेटमा पठाएका थिए ।
तर, प्रधानमन्त्री दाहालले कांग्रेसनिकट व्यक्तिहरुलाई मात्रै मन्त्रीले सदस्यमा सिफारिस गरेकोमा असन्तुष्टि जनाउँदैं उक्त फाइल निर्णय नगरेर रोकिदिएका हुन् । जसका कारण अस्पताल विकास समिति गठनमा समस्या भएको छ ।
प्रधानमन्त्री दाहालले आफूले नै स्वास्थ्यको मन्त्रालयसमेत जिम्मेवारी लिएका बेला २० चैतमा विपी कोइराला मेमोरियल क्यान्सर अस्पताल विकास समितिको अध्यक्षमा माओवादी निकट विजयराज न्यौपानेलाई नियुक्त गरेका थिए ।
विपी कोइराला मेमोरियल क्यान्सर अस्पताल (गठन) आदेशमा अस्पताल विकास समितिले अस्पतालको कार्यकारी निर्देशक नियुक्त गर्ने व्यवस्था छ । तर, अस्पताल विकास समितिले पूर्णता नपाउँदा कार्यकारी निर्देशक नियुक्ति प्रक्रिया अगाडि बढ्न सकेको छैन ।
