जुम्ला—प्रदेश अस्पताल सुर्खेतमा शल्यक्रिया गरेकोे २४ घण्टा नबित्दै एक सुत्केरीको मृत्यु भएको छ । वीरेन्द्रनगर–४ सुर्खेतकी ३० वर्षीया जानकी रेग्मी अधिकारीको शल्यक्रिया भएको २४ घण्टा नबित्दै अस्पतालमै ज्यान गएको हो ।
सुत्केरी ब्यथाले च्यापेपछि अस्पताल भर्ना भएकी जानकी नियमित डाक्टरको निगरानीमा थिइन् । तर, शल्यक्रिया पश्चात जनरल वार्डमा सारिएको २४ घण्टापछि उनको ज्यान गएको मृतक जानकीका ससुरा नाता पर्ने तिलकराम अधिकारीले बताए ।
प्रदेश अस्पताललाई पछिल्लो समय प्रदेशकै सुविधासम्पन्न अस्पतालका रुपमा लिने गरिन्छ । तर, सामान्य अवस्थामा शल्यक्रियामार्फत सुत्केरी गराइएकी जानकीको मृत्यु हुनुमा अस्पतालको गम्भीर लापरवाही भएको पीडित परिवारको आरोप छ ।
‘सुविधासम्पन्न मानिएको यस अस्पतालमा सुत्केरीको मृत्यु हुनपुग्यो,’ मृतकका सुसुरा अधिकारीले भने, ‘सकुसल बच्चा जन्मिएपछि सुत्केरीलाई प्रसुति वार्डमा सारियो । तर, २४ घण्टामा आफन्तलाई मृत्युको खबर आउदाँ हामी आश्चर्यमा छौं ।’
मृतक जानकीको घर अस्पतालबाट एक सय मिटर दूरी टाढा छ । यतिबेला मृतकका घर परिवारसँगै छिमेक पनि शोकमा छन् । परिवारले अस्पतालको लापरवाहीले जानकीको मुत्यु भएको दावी गर्दै मृत्युको कारण खोजिरहेका छन् । तर, अस्पतालले भने मृत्युको कारण अँझै खुलाएको छैन ।
अस्पतालका सूचना अधिकारी विनोद बस्नेतले जानकीको शल्यक्रिया पश्चात प्रसुति वार्डमा सारेर उपचार भइरहेको अवस्थामा एक्कासी श्वास फेर्न गाह्रो भएपछि सघन कक्षमा राखी उपचार गर्ने क्रममा मृत्यु भएको जानकारी दिए । जानकीको पोष्टमार्टम पश्चात मात्रै मृत्युको कारण खुल्ने सूचना अधिकारी बस्नेतको भनाइ छ ।
