काठमाडौं—धुम्बाराहीस्थित ‘हस्पिटल फर एडभान्स्ड मेडिसिन एण्ड सर्जरी लिमिटेड (ह्याम्स अस्पताल)’ ले सर्वसाधारणका लागि प्राथमिक सेयर (आईपीओ) जारी गर्ने भएको छ । २६ असोजको ह्याम्सको साधारणसभाले ११ लाख २५ हजार कित्ता सेयर सर्वसाधारणका लागि जारी गर्ने निर्णय गरेको अस्पताल अध्यक्ष रामशरण भण्डारीले जानकारी दिए ।
उनकाअनुसार कम्पनी पब्लिक लिमिटेडमा गएपछि आयोजना गरिएको पहिलो साधारणसभाले सर्वसाधारणका लागि जारी पुँजीको १५ प्रतिशत सेयर जारी गर्ने निर्णय गरेको हो । बाँकी ८५ प्रतिशत सेयर स्वामित्व भने संस्थापक समूहको हुनेछ ।
अस्पतालले सेयर निष्काशनका लागि ब्रिक्री प्रबन्धकमा मुक्तिनाथ क्यापिटललाई नियुक्त गरिएको छ । भण्डारीकाअनुसार साधारणसभाले आफ्ना सेयरधनीहरूलाई १७.३८ प्रतिशत बोनस सेयर र ०.६७ प्रतिशत नगद लाभांश वितरण निर्णयसमेत गरेको छ । त्यस पश्चात कम्पनीको कुल पुँजी ६३ करोड ७५ लाख रुपैयाँ हुनेछ ।
साधारणसभाले ५ सदस्यीय सञ्चालक समिति गठन गरेको छ । जसमा संस्थापक सेयरधनीको तर्फबाट रामशरण भण्डारी, प्रा.डा.गीता जोशी सायमी, दलबहादुर भण्डारी र प्रेमबहादुर भण्डारी रहेका छन् । यस्तै, स्वतन्त्र सञ्चालकमा टंकमणि शर्मा दंगाल छन् । पूर्व महालेखा परीक्षकसमेत रहेका शर्मा स्वास्थ्य र प्रशासकीय क्षेत्रका अनुभवी मानिन्छन् ।
