काठमाडौं–अर्थ मन्त्रालयले निर्माणाधीन ९८ वटा अस्पतालको स्रोत सुनिश्चितता नभएको भन्दै बजेट निकासामा रोक लगाएको छ । डिपीआर तयार भएर टेण्डरको तयारीमा रहेका १६ वटा अस्पताल निर्माण प्रक्रिया पनि अलमलमा परेको छ ।
सरकारले प्रत्येक स्थानीय तहमा ५, १० वा १५ शैय्याका आधारभूत अस्पताल निर्माण गर्ने भनी वि.सं. २०७७ सालमा एकैपटक ३९६ वटा र त्यसको एक वर्षपछि २ सय ५९ आधारभूत अस्पताल निर्माण गर्ने निर्णय गरेको थियो । पहिलो चरणका ३ सय ९६ अस्पताल निर्माणका लागि स्रोत सुनिश्चित भएको तर पछिल्ला निर्णयका २ सय ५९ आधारभूत अस्पताल निर्माणको लागि स्रोत सुनिश्चतता भएको थिएन ।
अघिल्लो वर्ष निर्णय भएर स्रोत सुनिश्चितता भएका अस्पतालको निर्माणमा समस्या नभएतापनि पछिल्लो वर्ष निर्णय भएकामा भने समस्या देखिएको छ । पछिल्लो वर्ष निर्णय भएका २ सय ५९ अस्पतालमध्ये ९८ वटा निर्माणको चरणमा रहेका छन् । आर्थिक वर्ष २०७९/०८० सम्म स्रोत नै सुनिश्चित नभई निर्माण सुरु गर्न मन्त्रालयले कार्यादेश दिएको थियो ।
चालु आर्थिक वर्षमा भने देशमा आर्थिक संकट चुलिएसँगै ती निर्माणाधीन अस्पतालको स्रोत सुनिश्चितता नभएको भन्दै अर्थ मन्त्रालयले बजेट निकासा गरेको छैन । ‘पहिलो त्रैमासिकमा रकमान्तर हुने सम्भावना पनि हुँदैन,’ अर्थ मन्त्रालय स्रोतले भन्यो, ‘स्वास्थ्य मन्त्रालयले ३७ अर्ब बढीको स्रोत सुनिश्चितताका लागि पठाएको छ । त्यति ठूलो रकमको स्रोत सुनिश्चितता तत्काल गाह्रो छ ।’
अर्थ स्रोतकाअनुसार २ सय ५९ अस्पतालका लागि ४० अर्ब ३६ करोड ४१ लाख रुपैयाँ लागत स्वास्थ्य मन्त्रालयले पेश गरेको छ । स्रोत नै सुनिश्चित नभई अघिल्लो आर्थिक वर्षसम्म ४ अर्ब ३६ करोड ९५ लाख ६६ हजार रुपैयाँ निकासा भएर ३ अर्ब २५ करोड ४६ लाख ९७ हजार रुपैयाँ खर्च भइसकेको छ ।
