विराटनगर—साँझ परेपछि सुनसरी इटहरी–१५ की ६९ वर्षीया दिलकुमारी खड्काको संसार विस्तारै धमिलिन थाल्थ्यो । उमेर ढल्किँदै जाँदा आँखामा छाएको तुवाँलोले उनलाई आफ्नै घरभित्र हिँडडुल गर्न पनि कठिन हुन्थ्यो । तर, विराटनगर–१५ स्थित रानी आँखा अस्पताल आइपुगेपछि उनको जीवनमा फेरि उज्यालो फर्किएको छ ।
मोतियाबिन्दुले खुम्चिएको उनको दृष्टि अहिले तङ्ग्रिएको छ । अस्पतालले ज्येष्ठ नागरिकका लागि निःशुल्क उपचार गर्ने थाहा पाएपछि परिवारले उनलाई यहाँ ल्याएका थिए । चिकित्सकले परीक्षण गर्दा मोतियाबिन्दु पुष्टि भयो र लगत्तै शल्यक्रिया गरियो । ‘अहिले त राम्रोसँग देख्ने र हिँडडुल गर्न सक्ने भएँ,’ उपचारपछि प्रसन्न देखिएकी दिलकुमारीले भनिन्, ‘अस्पतालले निःशुल्क उपचार मात्रै होइन, चस्मा र औषधि पनि दियो, म त दंग छु ।’
दिलकुमारी त एक प्रतिनिधि पात्र मात्र हुन् । उनीजस्तै विराटनगर–१६ का ७९ वर्षीय बद्रीप्रसाद दाहाल पनि अहिले प्रफुल्ल छन् । मोतियाबिन्दुकै कारण दृष्टि गुमाउने अवस्थामा पुगेका दाहालको पनि अस्पतालले निःशुल्क शल्यक्रिया गरिदिएको छ । त्यस्तै, विराटनगरकै ७५ वर्षीय अशोककुमार राई र मोरङको विराटचोककी ७४ वर्षीया द्रोणकुमारी पोखरेलले पनि यस अस्पतालबाट नयाँ दृष्टि पाएका छन् ।
अस्पतालले सामाजिक उत्तरदायित्वअन्तर्गत ६५ वर्ष उमेर पूरा भएका ज्येष्ठ नागरिकका लागि निःशुल्क उपचार सेवा सञ्चालन गरेको हो । अस्पतालकी प्रशासन प्रमुख प्रतीक्षा बास्तोलाका अनुसार गत फागुन १ बाट सुरु भएको यो अभियानबाट हालसम्म ५० जनाभन्दा बढीले लाभ लिइसकेका छन् ।
‘हामीले ज्येष्ठ नागरिकसँगै अपाङ्गता भएका व्यक्ति, एकल महिला र एकल पुरुषका लागि पनि मोतियाबिन्दुको निःशुल्क शल्यक्रिया सेवा उपलब्ध गराउँदै आएका छौँ,’ बास्तोलाले भनिन् ।
अस्पतालमा दैनिक झण्डै २०० जना बिरामी आँखा जाँचका लागि आउने गरेका छन् । तीमध्ये दैनिक तीन जना मोतियाबिन्दुका बिरामीको निःशुल्क शल्यक्रिया गर्ने लक्ष्य अस्पतालले राखेको छ । वरिष्ठ नेत्ररोग विशेषज्ञ डा. अभिषेक सुवालको टोलीले बिरामीको उपचार गरिरहेको छ ।
कसरी लिने सेवा ?
यो निःशुल्क सेवा लिनका लागि सम्बन्धित वडा कार्यालयको सिफारिस अनिवार्य गरिएको छ । साथै, परिचय खुल्ने नागरिकताको प्रमाणपत्र र हालसालै खिचिएको फोटो लिएर आउने जोसुकै लक्षित वर्गले यो सुविधा पाउने अस्पतालले जनाएको छ ।
सामान्यतयाः मोतियाबिन्दुको शल्यक्रिया खर्चिलो हुने भएपनि अस्पतालले शल्यक्रिया, आवश्यक औषधि र चस्मासमेत निःशुल्क उपलब्ध गराएपछि विपन्न र सहाराविहीन ज्येष्ठ नागरिकलाई ठूलो राहत मिलेको छ ।
उमेरका कारण दृष्टि गुमाएर अँध्यारोमा बस्न बाध्य नागरिकका लागि रानी आँखा अस्पतालको यो मानवीय कार्य अहिले विराटनगर क्षेत्रमा प्रशंसनीय बनेको छ ।
