काठमाडौं—चिकित्सा शिक्षा आयोगको रिक्त चार वटा महत्वपूर्ण निर्देशक पदका लागि तीव्र प्रतिस्पर्धा सुरु भएको छ । आयोगको चार वटा प्रभावशाली निर्देशनालयको रिक्त चार निर्देशक पदका लागि १२ जना चिकित्सकहरु मैदानमा छन् ।
आयोगको मापदण्ड तथा प्रत्यायन, योजना, समन्वय र प्राज्ञिक उन्नय, परीक्षा निर्देशनालय र नेशनल बोर्ड अफ मेडिकल स्पेसियालिटिज गरी चार वटा निर्देशनालय छन् । चार वटै निर्देशनालयमा निर्देशक पद रिक्त छन् ।
रिक्त निर्देशक पदका लागि आयोगले २६ असारमा आवेदन माग गरेको थियो । आवेदकहरुमध्येबाट योग्यता, कार्य अनुभव र सोचपत्रको मूल्याङ्कनमा उत्कृष्ट १२ जना प्राध्यापक डाक्टरहरुको अन्तिम सूची आयोगले सार्वजनिक गरेको छ ।
अन्तिम सूचीमा परेका १६ जनालाई आयोगले ८ साउनमा अन्तर्वार्ताका लागि बोलाइएको छ । अन्तर्वार्ताबाट समेत उत्कृष्ट भएका चार जना आयोग चार वटा निर्देशनालयको निर्देशक बन्नेछन् ।
आयोगको चार वटा निर्देशक पदका लागि प्रतिस्पर्धामा चिकित्सा क्षेत्रका अनुभवी तथा प्रशासनिक अनुभव भइसकेका विज्ञ चिकित्सकहरु प्रतिस्पर्धामा छन् ।अनुभवी र प्राज्ञिक चिकित्सकरुको दौडले आयोगको निर्देशकको प्रतिस्पर्धालाई रोचक बनाइदिएको छ ।
अनुभवी अनुहारहरूको वर्चस्व
१. प्रा.डा. दयाराम पोखरेल
बारबर्दिया—४ बर्दियाका प्रा.डा. पोखरेल बायोकेमेष्ट्रीका प्राध्यापक हुन् । उनी हाल मणिपाल मेडिकल कलेजमा प्राध्यापकका साथै बायोकेमेष्ट्री विभागका प्रमुख छन् ।
२. प्रा.डा. दिपेन्द्र बहादुर श्रेष्ठ
काठमाडौंका प्रा.डा. दिपेन्द्र श्रेष्ठ चिकित्सा विज्ञान राष्ट्रिय प्रतिष्ठान (न्याम्स)का प्राध्यापक हुन् । वरिष्ठ नाक, कान, घाँटी रोग विशेषज्ञ उनी यसअघि वीर अस्पतालको विभागीय प्रमुख समेत रहिसकेका अनुभवी चिकित्सक हुन् ।
३. प्रा.डा. दिलिप शर्मा
भक्तपुरका प्रा.डा. शर्मा वीर अस्पतालका वरिष्ठ कलेजो रोग विशेषज्ञ हुन् । उनीवीर अस्पतालको निर्देशक, चिकित्सा शिक्षा आयोगको निर्देशक र नेपाल मेडिकल काउन्सिलको रजिष्ट्रारजस्ता चिकित्सा शिक्षाका प्रमुख प्रशासनिक पदहरू सफलतापूर्वक सम्हालिसकेका अनुभवी चिकित्सक हुन् ।
४. प्रा.डा. विनोदकुमार यादव
महोत्तरी औरहीका प्रा.डा. यादव मेडिकल बायोकेमिस्ट्रीका प्राध्यापक हुन् । उनी मधेश स्वास्थ्य विज्ञान प्रतिष्ठानको रजिस्ट्रारको रूपमा प्रशासनिक नेतृत्व सम्हालिरहेका छन् ।
५. प्रा.डा. मृगेन्द्र अमात्य
ललितपुर निवासी प्रा.डा. अमात्य चिकित्सा क्षेत्रका वरिष्ठ प्राध्यापक तथा विभिन्न स्वास्थ्य सेवा एवं शिक्षण संस्थामा लामो समयदेखि आवद्ध विशेषज्ञ चिकित्सक हुन् ।
६. प्रा.डा. रविन्द्रमान श्रेष्ठ
ललितपुरका प्रा.डा. श्रेष्ठ पिपुल्स कान्तिपुर डेन्टल कलेजका प्रिन्सिपल हुन् । अर्थोडोन्टिस्टका प्राध्यापक उनले नेपाल मेडिकल काउन्सिलको निर्वाचनमा प्रमुख निर्वाचन अधिकृतको जिम्मेवारी सम्हालेका थिए । काउन्सिलका पूर्व सदस्य तथा स्वास्थ्य एवं चिकित्सा शिक्षा क्षेत्रका लामो प्राज्ञिक अनुभव भएका प्राध्यापक हुन्— उनी ।
७. प्रा.डा. विष्णुप्रसाद शर्मा
ललितपुरका स्थायी वासिन्दा प्रा.डा. शर्मा पाटन स्वास्थ्य विज्ञान प्रतिष्ठानअन्तर्गत पाटन अस्पतालका पूर्व निर्देशक समेत हुन् । त्यहाँ उनले लामो समय प्राध्यापन पनि गराएका थिए । प्रा.डा. शर्मा अहिले नेपाल मेडिकल कलेजमा डेन्टल डाइरेक्टरका रुपमा कार्यरत छन् । केही समय उनी मदन भण्डारी स्वास्थ्य विज्ञान प्रतिष्ठानमा सक्रिय थिए । प्रा.डा. शर्मा अनुभवी चिकित्सक तथा प्राज्ञका गनिन्छन् ।
८. प्रा.डा. संघरत्न बज्राचार्य
काठमाडौंका प्रा.डा. बज्राचार्य चिकित्सा शिक्षा आयोगको योजना, समन्वय तथा प्राज्ञिक उन्नयन निर्देशनालयको पूर्व निर्देशक हुन् । उनी त्रिवि चिकित्साशास्त्र अध्ययन संस्थान (आईओएम)को फर्माकोलोजीका प्राध्यापक हुन् ।
९. प्रा.डा. सञ्जयकुमार श्रेष्ठ
काठमाडौंका प्रा.डा. श्रेष्ठ चिकित्सा शिक्षा र स्वास्थ्य सेवा क्षेत्रका अनुभवी प्राध्यापक तथा आयोगका विभिन्न कार्यकारी पदहरूको प्रतिस्पर्धामा निरन्तर सक्रिय विज्ञ हुन् ।
१०. प्रा.डा. सन्ध्या चापागाई आचार्य
भक्तपुरको मध्यपुर थिमी निवासी प्रा.डा. सन्ध्या वीर अस्पतालकी वरिष्ठ क्यान्सर रोग विशेषज्ञ हुन् । उनी नेपाल मेडिकल काउन्सिलमा सरकारबाट मनोनित पूर्व सदस्य रहिसकेकी महिला प्राज्ञिक व्यक्तित्व हुन् । वीरको क्लिनिकल कोर्डिनेटर, एकेडेमिक कोर्डिटरसमेत रहिसकेकी उनी आयोगको निर्देशकको प्रतिस्पर्धामा रहेकी एक्ली महिला उम्मेदवार हुन् ।
११. प्रा.डा. सुरज बज्राचार्य
काठमाडौंका प्रा.डा. बज्राचार्य किष्ट मेडिकल कलेजको शिक्षण अस्पतालका पूर्व निर्देशक हुन् । हाल उनी स्टार अस्पतालको अस्पताल निर्देशकका रुपमा कार्यरत छन् । अर्थोपेडिक्सका प्राध्यापक प्रा.डा. बज्राचार्य स्वास्थ्य संस्थामा उच्च प्राज्ञिक तथा चिकित्सकीय अनुभव भएका प्राध्यापक हुन् ।
१२. प्रा.डा. शैलेश प्रधान
ललितपुर महालक्ष्मीका प्रा.डा. प्रधान चिकित्सा शिक्षा क्षेत्रका दक्ष प्राध्यापक एवं विभिन्न प्राज्ञिक समितिहरूमा अनुभव संगालेका विज्ञ चिकित्सक हुन् । उनी काठमाडौं मेडिकल कलेजको प्याथोलोजी विभागका हेड तथा प्याथोलोजीका प्राध्यापक हुन् । प्रा.डा. प्रधान नेपाल मेडिकल एशोसिएसनका एक कार्यकालका कार्यकारी समिति सदस्य पनि रहिसकेका छन् ।
