काठमाडौं – अष्ट्रेलियाबाट फर्केर मिस नेपाल २०२६ भाग लिइरहेकी प्रतियोगी नम्बर १४ प्रतिमा खड्काले सौन्दर्य प्रतियोगितालाई केवल ताज जित्ने यात्रा नभई सामाजिक परिवर्तनको अभियानका रूपमा लिएको बताएकी छन् । सामाजिक कार्यकर्ता, मानसिक स्वास्थ्य अभियन्ता तथा सामुदायिक नेतृत्वकर्ता प्रतिमा नेपाललाई मानसिक कल्याण, करुणा र सचेत जीवनशैलीको विश्वव्यापी केन्द्रका रूपमा स्थापित गर्ने दीर्घकालीन लक्ष्य रहेको बताउँछिन् ।
सिन्धुपाल्चोककी २६ वर्षीया प्रतिमाले अष्ट्रेलियाको युनिभर्सिटी अफ वेस्टर्न सिड्नीबाट सोसल वर्कमा स्नातकोत्तर तथा कम्युनिटी सर्विसेजमा स्नातक अध्ययन गरेकी हुन् । अष्ट्रेलियामा बहुसांस्कृतिक समुदायसँग प्रत्यक्ष काम गर्दै उनले समुदाय विकास, सामाजिक समावेशिता, मानसिक स्वास्थ्य प्रवर्द्धन तथा नेतृत्वका क्षेत्रमा व्यावहारिक अनुभव हासिल गरेकी छन् ।
प्रतिमाका अनुसार मिस नेपाल २०२६ आफ्नो आवाजलाई समाजको हितमा प्रयोग गर्ने महत्वपूर्ण राष्ट्रिय मञ्च हो । उनी विशेषगरी मानसिक स्वास्थ्यप्रति समाजमा रहेको संकोच हटाउँदै मानसिक शान्ति, भावनात्मक सन्तुलन र आत्मिक दृढताको खोजलाई कमजोरी नभई साहस, आत्म-जागरूकता र सशक्तीकरणको प्रतीक बनाउने अभियानमा केन्द्रित हुन चाहन्छिन् ।
उनको विश्वास छ कि आज विश्व तनाव, चिन्ता र असन्तुलित जीवनशैलीका समाधान खोजिरहेको छ, जबकि नेपालसँग ध्यान, योग, सचेत श्वासप्रश्वास, माइन्डफुलनेस, करुणा तथा समग्र कल्याणजस्ता अमूल्य ज्ञान शताब्दीयौँदेखि विद्यमान छन् । यी परम्परागत अभ्यासलाई आधुनिक जीवनशैलीसँग जोडेर व्यवहारिक र वैज्ञानिक रूपमा प्रस्तुत गर्न सके नेपालले विश्वलाई नयाँ दिशा दिन सक्ने प्रतिमा बताउँछिन् ।
‘हामी विद्यालयमा अंग्रेजी, नेपाली, गणित र वित्तीय व्यवस्थापनबारे त सिक्छौं,’ प्रतिमा भन्छिन्, ‘तर, आफ्नै मानसिक अवस्थालाई कसरी व्यवस्थापन गर्ने भन्ने कुरा कसैले सिकाउँदैन ।’ उनका अनुसार इमोशनल रिजिलियन्स (भावनात्मक दृढता) जीवनको अत्यन्तै महत्वपूर्ण सीप हो ।
प्रतिमाले विदेशमा आर्जन गरेको ज्ञान, सीप र अन्तर्राष्ट्रिय अनुभवलाई नेपालमा समुदाय विकास, मानसिक स्वास्थ्य प्रवर्द्धन तथा दिगो सामाजिक परिवर्तनका लागि प्रयोग गर्ने प्रतिबद्धता व्यक्त गरेकी छन् । उनका अनुसार परिवर्तनका लागि विदेशी सोचको नक्कल होइन, नेपालको मौलिक संस्कृति र विश्वस्तरीय अभ्यासबीचको समन्वय आवश्यक छ ।
सन् २०१६ देखि आर्ट अफ लिभिङ फाउन्डेसनमा सक्रिय स्वयंसेवक रहेकी प्रतिमा हाल दिदीबहिनी विमेन्स नेटवर्क अष्ट्रेलियाको न्यू साउथ वेल्सकी राज्य सचिवका रूपमा पनि कार्यरत छिन् । स्वयंसेवा, ध्यान, सचेत श्वासप्रश्वास तथा मानवीय सम्बन्धले व्यक्तिको जीवनमा ल्याउने सकारात्मक परिवर्तनलाई उनले नजिकबाट अनुभव गरेकी छन् ।
प्रतिमाको भनाइमा मानसिक स्वास्थ्यको उपचार मात्र पर्याप्त छैन, मानसिक कल्याणसम्बन्धी शिक्षा पनि प्रत्येक बालबालिका, युवा तथा वयस्कका लागि आवश्यक छ । विद्यालयमा गणित, विज्ञान र भाषा पढाइए पनि भावना व्यवस्थापन, तनाव नियन्त्रण, मनलाई शान्त राख्ने तथा जीवनका चुनौतीसँग जुध्ने सीपलाई पर्याप्त प्राथमिकता नदिइएको उनको धारणा छ ।
मानसिक कल्याणसँगै प्रतिमा जलवायु परिवर्तन र वातावरण संरक्षणलाई पनि आफ्नो प्राथमिकतामा राख्छिन् । कृषि, हिमाली पारिस्थितिक प्रणाली तथा प्राकृतिक स्रोतमा निर्भर नेपालका लागि वातावरण संरक्षण जनजीविका, खाद्य सुरक्षा र भावी पुस्ताको भविष्यसँग प्रत्यक्ष जोडिएको विषय भएको उनको भनाइ छ । उनका अनुसार प्रकृतिको संरक्षण र मानव स्वास्थ्य एकअर्कासँग अभिन्न रूपमा सम्बन्धित छन् ।
मिस नेपालको मञ्चमार्फत प्रतिमा भावनात्मक रूपमा सक्षम, सामाजिक रूपमा जिम्मेवार, वातावरणप्रति सचेत तथा आफ्ना मौलिक मूल्यप्रति गर्व गर्ने नयाँ पुस्तालाई प्रेरित गर्न चाहन्छिन् । उनको दीर्घकालीन लक्ष्य नेपाललाई केवल सगरमाथाको देशका रूपमा मात्र नभई मानसिक कल्याण, करुणा, सचेत जीवनशैली तथा प्राचीन ज्ञानको विश्व केन्द्रका रूपमा स्थापित गर्नु रहेको छ ।
