काठमाडौं—वीरगन्जको सबैभन्दा ठूलो सरकारी अस्पताल नारायणी अस्पतालमा बिरामीको मृत्यु भएपछि एक जना चिकित्सक गम्भीर कुटपिटमा परेका छन् । शनिबार विहान वीरगञ्ज महानगरपालिका–२५ निवासी ४५ वर्षीय राजकुमार पटेलको अस्पतालको आकस्मिक कक्षमा मृत्यु भएको थियो ।
चिकित्सकको टोलीले तत्काल आवश्यक उपचार उपलब्ध गराउँदा–गराउँदै पनि कार्डियाक अरेष्टका कारण ती बिरामीको मृत्यु भएपछि आक्रोशित भिडले डा. प्रमोद रामलाई गम्भीर कुटपिट गरेको छ । कुटपिटबाट गम्भीर घाइते भएका डा. प्रमोदको हाल अस्पतालको आईसीयुमा उपचार भइरहेको छ ।
डा. प्रमोदले मास्क लगाएका व्यक्तिहरुले आफूलाई हेलमेट र ढुंगाले प्रहार गरेर कुटपिट गरेको बताए । ‘घटनापछि बैठकको लागि गइरहेको बेला मास्क लगाएका ब्यक्तिहरुले हेलमेट र ढुङगाले कुटपिट गरे,’ उनले भने, ‘कुटपिट हुँदै गर्दा म हिलोमा परे ।’
उनले प्रहरीकै अगाडि आफूमाथि योजनाबद्ध रुपमा कुटपिट गरिएको दावी गरे । ‘प्रहरी हुँदाहुँदै पनि म माथि कुटपिट भयो,’ डा. प्रमोदले थपे, ‘म माथि योजनाबद्ध तरिकाले नै कुटपिट भएको हो ।’
डा. प्रमोदले केही बेर आफ्नो घाँटी थिचिएको समेत खुलासा गरेका छन् । ‘केही बेर मेरो घाँटी समेत थिचिएको थियो,’ उनले भने, ‘सो पश्चात म नि छुटाएर भागे ।’
डा. प्रमोद एक वर्षदेखि वीरगन्जस्थित नारायणी अस्पतालमा छात्रवृत्ति करारका रुपमा कार्यरत छन् । उनले नेशनल मेडिकल कलेज वीरगन्जबाट छात्रवृत्तिमा एमबीबीस उत्तीर्ण गरेका हुन् ।
