प्रधानमन्त्रीको स्वास्थ्य अवस्था सुधारोन्मुख

काठमाडौं—प्रधानमन्त्री केपी शर्मा ओलीको स्वास्थ्य अवस्था खतरामुक्त रहेको चिकित्सकहरुले बताएका छन् । बिहीबार शिक्षण अस्पतालस्थित मनमोहन कार्डियो थेरासिस एण्ड भास्कुलर ट्रान्सप्लान्ट सेन्टरमा पत्रकार सम्मेलन गर्दै चिकित्सकहरुले प्रधानमन्त्रीको स्वास्थ्य अवस्थाबारे जानकारी दिएका हुन् ।

३ दिनअघि एपेन्डिसाइटिसको शल्यक्रिया गरेर प्रधानमन्त्री मनमोहन काडियो थेरासिस एण्ड भास्कुलर ट्रन्सप्लान्ट सेन्टरमा उपचाररत छन् । ‘प्रधानमन्त्रीको स्वास्थ्य सुधारोन्मुख छ,’ उनकी निजी चिकित्सक प्रा.डा. दिव्यासिंह शाहले भनिन्, ‘उहाँको फिजिकल र बायोकेमिकल मापदण्डहरुमा अपेक्षाकृत सुधार देखिएको छ ।’ साथै, प्रा.डा. शाहले प्रधानमन्त्रीलाई ठोस आहार दिन थालिएको बताइन् ।

साथै, मिर्गौलाको हेमाडायलाइसिस गराइरहेका प्रधानमन्त्रीको मिगौला पुनः प्रत्यारोपण गर्ने बारेमा पनि चिकित्सकहरुले छलफल थालेका छन् । तर, त्यसबारेमा ठोस निर्णय भने भैसकेको छैन् ।