काठमाडौं–विरामीको मृत्युपछि डडेल्धुरा अस्पतालमा उत्पन्न अवस्थापछि सरकारी चिकित्सक संघ (गोदान)ले त्यहाँ कार्यरत सबै चिकित्सकलाई काठमाडौं बोलाएको छ । संघका अध्यक्ष डा. दीपेन्द्र पाण्डेले आइतबार एक प्रेस विज्ञप्ति जारी गर्दै सुरक्षाको ग्यारेन्टी नभएसम्म र दोषीलाई तत्काल हिरासतमा लिएर अनुसन्धान नगरिएसम्म त्यहाँ कार्यरत चिकित्सकलाई आत्मरक्षाका लागि केन्द्रमा स्वास्थ्य तथा जनसंख्या मन्त्रालयमा हाजिर हुन आग्रह गरेका छन् ।
साथै, संघले यसबाट सिर्जित सम्पूर्ण परिस्थितीको जिम्मेवार स्थानीय निकाय, प्रशासन र स्वास्थ्य मन्त्रालयको हुने भन्दैं घटनापछि उत्पन्न परिस्थितीमा स्थानीय निकाय र प्रशासनको रबैयामाथि पनि प्रश्न उठाएको छ । विज्ञप्तिमा भनिएको छ, ‘चरम मानसिक तनाव र असुरक्षाकाबीच चिकित्सक तथा स्वास्थ्यकर्मीहरु रहुनु परेको र यस्तो अवस्थामा अवस्थामा स्वास्थ्य सेवा प्रवाह गर्न असम्भव छ ।’
संघले चिकित्सक तथा स्वास्थ्यकर्मी उपर दुब्र्यवहार तथा हातपात गर्ने र अराजकता मच्चाउने अपराधीलाई कारबाही गर्नुको सट्टा अस्पताल सञ्चालन गर्न चिकित्सकलगायतलाई दबाब दिनु स्थानीय प्रशासन को चरम निकम्मापन बताएको छ ।
‘उच्च साहसका साथ डडेलधुराजस्तो विकट ठाउँमा समेत उपचार सेवा संलग्न चिकित्सकहरु को उच्च मूल्यांकन हुनुपर्ने ठाँउमा यस्तो चरम मानसिक यातना दिइनु दुर्भाग्यपूर्ण रहेको र यसको असर कालान्तरसम्म त्यहाका स्थानीयले भोग्नुपर्ने भएकाले त्यहाँ कार्यरत चिकित्सक तथा स्वास्थ्यकर्मीको सुरक्षाको व्यवस्था स्थानीय सरकारको समेत रहेको ध्यानाकर्षण गराउदछौं,’ गोदानको विज्ञप्तिमा भनिएको छ ।
