वैज्ञानिकले पत्ता लगाए हन्ता भाइरसको अर्को प्रजाति : सजग रहन वैज्ञानिकको आग्रह

विश्व समुदायमा हन्ता भाइरसकै अर्को एक प्रजाति देखा परेको छ । तान्जानिया र कंगोका पुच्छर नभएका चमेरामा देखा परेको यस भाइरसलाई वैज्ञानिकले ‘किविरा भाइरस’ नाम दिएका छन् ।

यस भाइरसको सुरुवाती लक्षण फ्लुजस्तै हुने र यसबाट संक्रमित भएपछि यसले शरीरमा रगतको बहाव बढाउने र पछि किड्नीसमेत फेल गराउने कुरा सुरुवाती अध्ययनबाट पत्ता लागेको वैज्ञानिकले जनाएका छन् ।

यस सम्बन्धी पूर्ण अध्ययन नभएको भएपनि भाइरसले कतिको असर गर्छ भन्ने कुरा भाइरसमै निर्भर हुने वैज्ञानिकहरुले जनाएका छन् । मुसाबाट फैलिएको हन्ता भाइरसले अमेरिकामा संक्रमित तीन जनामा एकको मृत्यु भएको थियो भने त्यस्तै अर्को भाइरसले दुई सय जनामा संक्रमण हुँदा एकको पनि मृत्यु भएको थिएन ।

बर्लिनकी डा. सब्रिना वेइसको नेतृत्वमा भएको अध्ययनले त्यस किसिमका चमेराले अफ्रिकाका धेरै क्षेत्र ओगटेको जनाएको छ । तर, अध्ययनले ३३४ चमेराको जाँच गर्दा ६ वटामा मात्रै यो भाइरस देखिएको जनाएका छन् । हन्ता भाइरसको अर्को प्रजातिको असरबारे एकिन नै नभएपनि सजग रहन वैज्ञानिकले आग्रह गरेका छन् ।