गौरीशंकर गाउँपालिकाका उपाध्यक्ष तामाङको उपचारका क्रममा निधन

चरिकोट—दोलखा गौरीशंकर गाउँपालिकाका उपाध्यक्ष श्यामसुन्दर तामाङको उपचारका क्रममा निधन भएको छ । दुई दिनअघि स्वास्थ्यमा समस्या आएपछि अस्पताल भर्ना भएका तामाङको आइतबार उपचारका क्रममा निधन भएको हो ।

तामाङको काठमाडौंको गंगालाल हृदयरोग केन्द्रमा निधन भएको हो । तामाङलाई पेट दुख्ने र पखाला लाग्ने समस्या भएपछि दुई दिनअघि भक्तपुरको मध्यपुर थिमी अस्पतालमा भर्ना भएका थिए ।

थिमी अस्पतालमा उपचार सम्भव नभएपछि अस्पतालले गंगालाल हृदयरोग केन्द्र बाँसबारी रिफर गरिएको थियो । तामाङलाई हिजोबाटै सिसियु कक्षमा राखेर उपचार गरिएकोमा स्वास्थ्यमा जटिल समस्या देखिएपछि आइतबार दिउँसो शल्यक्रिया गरिएको पारिवारिक स्रोतले बताएको छ ।

गौरीशंकर गाउँपालिका–६ चंखु घर भएका तामाङ वि.सं. २०७९ स्थानीय तहको निर्वाचनमा नेपाली कांग्रेसबाट गठबन्धनको उम्मेदवार भएर उपाध्यक्ष निर्वाचित भएका थिए ।