विपीमा पहिलो पटक प्लाज्मा थेरापी गरिएका कोरोना संक्रमितको मृत्यु

विराटनगर—सुनसरीको धरानस्थित विपी कोइराला स्वास्थ्य विज्ञान प्रतिष्ठानमा पहिलो पटक प्लाज्मा थेरापी गरिएका कोरोना संक्रमितको पनि मृत्यु भएको छ । धरान उपमहानगरपालिका–८ का ६८ वर्षीय ती व्यवसायी संक्रमितको आइतबार साँझ साढे ६ बजे मृत्यु भएको हो ।

साउन २९ गते कोरोना पुष्टि भएपछि ३० गते उनलाई प्रतिष्ठानको कोभिड अस्पतालमा भर्ना गरिएको थियो । अवस्था गम्भीर बनेपछि उनको प्लाज्मा थेरापी पद्धतिबाट उपचार गरिएको थियो ।

मोरङको सुन्दरहरैचाका कोरोनामुक्त भएका युवाले प्लाज्मा दिएका उनको उपचारको क्रममा मृत्यु भएको प्रतिष्ठानका प्रवक्ता डा. निदेश सापकोटाले जानकारी दिए । मृतक पुरुष विपीमा प्लाज्मा थेरापी गरिएका पहिलो संक्रमित हुन् । प्लाज्मा थेरापी गरिएका दोस्रो व्यक्तिको शनिबार दिउँसो मृत्यु भएको थियो ।

यो सँगै धरानमा कोरोना संक्रमितको मृत्यु हुनेको संख्या तीन जना पुगेको छ । एक महिला र दुई पुरुषको मृत्यु भएको हो ।

प्रदेश १ मा कारोनाको कारण ज्यान गुमाउने हालसम्म १७ जना पुगेका छन् । जसमध्ये १४ जना मोरङ र तीन जना सुनसरीको धरानका हुन् ।