सुर्खेत– नेपाल आयुर्वेद स्वास्थ्यकर्मी समाजले कर्णाली प्रदेश सरकारले आयुर्वेद चिकित्सालाई धरासायी बनाएको गुनासो गरेका छन् । पछिल्लो समयमा सरकारले आयुर्वेद चिकित्सालाई मर्ज गर्ने गरि गरेको निर्णयप्रति समाजले आपत्ति जनाएको हो ।
विज्ञहरूको परामर्शबिना र आयुर्वेद स्वास्थ्यकर्मीहरूको विमती हुँदाहुँदै गत आर्थिक वर्षमा कर्णाली सरकारले आयुर्वेद चिकित्सालाई एलोपेथ स्वास्थ्य संस्थामा मर्ज गरेको उनीहरूको गुनासो छ ।
आयुर्वेद स्वास्थ्यकर्मी समाजले खर्च घटाउने नाममा स्वास्थ्य संस्थालाई मर्ज गरी आयुर्वेद चिकित्साको अस्तित्वलाई मेटाउने योजनाका विरुद्धमा विभिन्न मागहरू समेत प्रस्तुत गरेको छ ।शनिबार सुर्खेतको वीरेन्द्रनगरमा आयोजना गरेको पत्रकार सम्मेलनमा समाजले आयुर्वेद चिकित्सालाई दुईवटा कोठामा मात्रै सिमित गरेको भन्दै असन्तुष्टि जनाएको छ ।
एलोपेथ र आयुर्वेद चिकित्सा सैद्धान्तिक रूपमै फरक भएको भन्दै कर्णालीका नागरिकलाई सरकारले आयुर्वेद चिकित्साबाट बञ्चित गर्न खोजेको समाजको आरोप छ । नेपाल आयुर्वेद स्वास्थ्यकर्मी समाजका अध्यक्ष दीपेन्द्र कँडेलले प्रदेश सरकारले आयुर्वेद चिकित्सालाई अन्य स्वास्थ्य संस्थामा मर्ज गर्नु उपयुक्त नभएको बताए । उनले आयुर्वेदका संरचना नै घटाएर साँघुरो बनाइदा ७५ प्रतिशत बिरामी घटेको जानकारी दिए ।
कँडेलका अनुसार अघिल्लो आर्थिक वर्षमा सुर्खेतस्थित आयुर्वेद औषधालयमा एक लाख १० हजार बिरामी आएकोमा गएको वर्ष ३० हजार मात्रै बिरामीले सेवा लिएका छन् । ‘आयुर्वेद औषधालयको भवनलाई डाक्टरको क्वाटर बनाइएको छ,’ अध्यक्ष कंँडेलले भने ‘आयुर्वेदलाई प्रदेश अस्पतालको दुई वटा कोठामा सिमित गरियो,’ उनले भने ।
उनीहरूले सरकारसँग विभिन्न ११ वटा मागसहितको पत्र सम्बन्धित निकायलाई बुझाएको जनाएका छन्। यति गर्दा समेत सरकारले आफूहरूका माग सुनुवाई नगरे चरणबद्ध आन्दोलनमा जान बाध्य हुने अध्यक्ष कंडेलले बताए । कर्णाली प्रदेश सरकारले अर्गानिक प्रदेश र जडिबुटीको संरक्षण गरिने भनेपनि सो अनुसारको काम नगर्नु दुःखद् भएको स्वास्थ्यकर्मीहरूको भनाइ छ ।
