विराटनगर—पूर्वी नेपालको सबैभन्दा ठूलो सरकारी हस्पिटल विराटनगरस्थित कोशी अस्पतालमा निमार्णाधीन भवनको साढे दुई वर्षमा २५ प्रतिशत मात्र काम पूरा भएको छ । साढे दुई वर्षको सम्झौता अवधि सकिन तीन हप्ता बाँकी रहँदा २५ प्रतिशत मात्र निर्माण कार्य पूरा भएको हो ।
कोशीको भवन निर्माणको सम्झौता अवधि यही पुस २२ गते सकिदैंछ । सम्झौता अवधि सकिनुअघि पहिलो पटक म्याद थप गर्ने तयारी गरिएको छ । कोशी अस्पतालको नयाँ भवन निर्माणको लागि सहरी विकास तथा भवन निर्माण विभाग संघीय आयोजना कार्यान्वयन इकाई विराटनगरले ५० करोड ३४ लाख ४४ हजार ७ सय १४ रुपैयाँमा टेण्डर खुलाएको थियो ।
रमन भूमी, बि.आई.पि.एल. जेभीले ३३ करोड २२ लाख ४८ हजार ९ सय ११ रुपैयाँ ३३ पैसामा ठेक्का लिएको थियो । उक्त जेभीले ठेक्का पाएपछि वि.सं. २०७८ असार २३ गते संघीय आयोजना कार्यान्वयन इकाईसँग सम्झौता गरेपछि २१ असोजमा तत्कालीन स्वास्थ्य तथा जनसंख्या राज्यमन्त्री उमेश श्रेष्ठलाई ल्याएर शिलान्यास गरिएको थियो ।
कोशीभित्र बन्दै आएको अत्याधुनिक सुविधा सम्पन्न पाँच तले भवन निर्माणको काममा भएको ठेकेदार भित्रको आन्तरिक विवाद र ढिलासुस्तीको कारण निर्माणमा ढिलो भएको छ । सुरूमा कृष्ण बोहरा संचालक रहेको भूमी कन्ट्रक्सनले निमार्णको काम सुरु गरेको थियो ।
निर्माण सुरु गरेको केही दिनपछि भूमीले करिब पाँच महिना निर्माणको काम रोकेर ठेकेदार बोहरा सम्पर्कबिहीन भए । अहिले पवनकुमार महतो संचालक रहेको भूमी कन्ट्रक्सनका पार्टनर रमणले निर्माणको काम सुरु गरेको छ ।
लामो समयसम्म निर्माणको काम रोकिएको र निर्माण सम्पन्न नभएपछि पहिलो पटक म्याद थप गरिने तयारी गरिएको सहरी विकास तथा भवन निर्माण विभाग संघीय आयोजना कार्यान्वयन इकाईका प्रमुख सुरेन्द्रकुमार साहले बताए । ‘निर्माण कम्पनीले म्याद थपको लागि समयसीमा माग गर्ने तयारी गर्दैछ,’ उनले भने, ‘म्याद सकिने अगाडि पहिलो पटक म्याद थप गरिनेछ ।’
ठेकेदार कम्पनीले घाटा हुने भन्दै काममा ढिलासुस्ती गरेको बुझिएको छ । टेन्डर आव्हान गरेको भन्दा १७ करोड रुपैयाँ कम लागतमा ठेक्का पारेको सो जेवीले घाटा लाग्ने भन्दै काम गर्न ढिलासुस्ती गरेको निर्माण व्यवसायीहरुले बताउँछन् ।
निर्माण कम्पनीले हालसम्म ८ करोड रुपैयाँभन्दा बढी रकम भुक्तानी लिइसकेको छ । निर्माण गरेअनुसारको भुक्तानी लिएको हो । यसरी निर्माणको चरणमा रहँदैं गर्दाबीच नै ठेकेदारले काम रोक्दा सम्झौता अवधिमा निर्माण पूरा हुन नसक्ने प्राविधिकहरुले बताएका छन् ।
कस्तो बन्नेछ नयाँ भवन ?
चार कठ्ठा २ धुर जमिनमा बन्ने भवनको पहिलो तलामा आकस्मिक कक्ष हुनेछ । अन्डरग्राउण्ड भवनको भुइँ तलामा पार्किङ हुने स्टैमेटमा उल्लेख गरिएको छ । दोस्रो तलामा एचडियूसहितको डाइलाइसिसलगायतका सेवाहरू हुनेछ ।
यस्तै, तेस्रो तलामा नेफ्रोलोजी जनरलसहितको प्रतिक्षालय हुनेछ । तेस्रो तलामा ५० शैय्याको हुनेछ । यसैगरी, चौथो तलामा कार्डियो र न्यूरोको सेवा रहनेछ । चौथो तलामा ५० शैय्याको हुनेछ ।
पहिलो चरणमा पाँच तलाको भवन बन्नेछ । त्यसपछि योजनाअनुसार तला थप हुँदै जानेछ । मास्टर प्लानअनुसार ७ तलाको बनाइने भवनको लागत स्टीमेटमा पाँचौ तलामा ५२ शैय्याको जनरल वार्ड र छैटौ तलामा हेल्थ अफ डिपार्टमेन्ट बनाउने उल्लेख गरिएको छ । हाल ३ सय ५० शैय्याको अस्पताल रहेको कोशीको सुविधासम्पन्न भवन बनेपछि पाँच सय शैय्या पु¥याउने तयारी गरिएको छ ।
