काठमाडौं—स्वास्थ्य मन्त्रालयबाट मनोनयन भएर वैदेशिक भ्रमणमा जानेहरुमा अधिकांस ९, १० र ११ औं तहका कर्मचारीकै हालीमुहाली भएको पाइएको छ । विगत एक वर्षमा उच्च तहका अधिकांश कर्मचारीहरु मात्रै अन्तर्राष्ट्रियस्तरका कार्यक्रममा अवसर पाएका छन् ।
९३ प्रतिशत यही तहका कर्मचारी विदेश भ्रमणमा गएको पाइएको छ । ७ प्रतिशत भने अधिकृतस्तर मुनी र अन्य क्षेत्रका रहेका छन् । हेल्थ आवाजले स्वास्थ्य मन्त्रालयसँग सूचनाको हक प्रयोग गरेर प्राप्त गरेको विवरणअनुसार वैदेशिक भ्रमणमा मनोनयन भई जाने कर्मचारीमा सबैभन्दा बढी उच्च तहको पाइएको हो ।
प्राप्त विवरणअनुसार एक वर्षमा सबैभन्दा बढी विदेश भ्रमण जानेमा स्वास्थ्य सेवा विभाग इपिडिमियोलोजी तथा रोग नियन्त्रण महाशाखाका प्रमुख डा. विवेककुमार लाल रहेका छन् । उनी एक वर्षको अवधिमा ९ पटक अन्तर्राष्ट्रिय कार्यक्रममा सहभागी भएका छन् ।
दोस्रोमा स्वास्थ्य मन्त्रालय गुणस्तर मापन महाशाखाका प्रमुख डा. दिपेन्द्ररमण सिंह ७ पटक विदेश भ्रमणमा गएका छन् । तेस्रोमा परिवार कल्याण महाशाखाको खोप शाखा प्रमुख डा. झलक शर्मा गौतम रहेका छन् । उनी एक वर्षमा ६ पटक विदेश गएको स्वास्थ्य मन्त्रालयको तथ्यांकमा उल्लेख छ ।
औषधि व्यवस्था विभागका तत्कालीन निर्देशक नारायण ढकाल र उपचारात्मक प्रवद्र्धन महाशाखाका प्रमुख डा. तारा पोखरेल ५/५ पटक विदेश गएका छन् । त्यसैगरी, मन्त्रालयका प्रवक्ता समेत रहेका समन्वय महाशाखा प्रमुख महेन्द्रप्रसाद श्रेष्ठ, जनसंख्या महाशाखाका उपसचिव मुक्ति खनाल र स्वास्थ्य सेवा विभागका शम्भुप्रसाद ज्ञवाली ४/४ पटक विदेश भ्रमण गएका छन् ।
मन्त्री ३ पटक राज्य मन्त्री र सचिव २/२ पटक
मन्त्रालयले उपलब्ध गराएको विदेश भ्रमणमा जाने व्यक्तिको सूचीमा उपप्रधान एवं स्वास्थ्य तथा जनसंख्या मन्त्री उपेन्द्र यादव तीन वटा देशको भ्रमणमा गएका छन् । त्यसैगरी, स्वास्थ्य राज्यमन्त्री डा. सुरेन्द्र यादव र सचिव पुष्पा चौधरी २/२ पटक विदेश भ्रमणमा गएको तथ्यांक उपलब्ध छ । तर, मन्त्री यादव एक वर्षमा ६ पटकभन्दा बढी विदेश भ्रमणमा गएको मन्त्रालय स्रोतको दाबी छ ।
एक वर्षको अवधिमा स्वास्थ्य मन्त्रालयको मनोनयनमा १ सय ३४ वटा अन्तर्राष्ट्रियस्तरको कार्यक्रममा ३ सय ६ जना भाग लिएका छन् । जसमा अधिकांश स्वास्थ्य मन्त्रालय र स्वास्थ्य सेवा विभागका कर्मचारी रहेका छन् ।
