भारत औषधि र कच्चा पदार्थ नेपाल पठाउन तयार

काठमाडौं—भारत निर्यातमा रोक लगाएका औषधि र कच्चा पदार्थ नेपाल पठाउन सहमत भएको छ ।

वाणिज्य सचिवस्तरमा भएको वार्तामा भारतले औषधि, कच्चा पदार्थ, इन्धन र खाद्यान्न नेपाल पठाउन तयार भएको वाणिज्यमन्त्री तथा आपूर्ति मन्त्री लेखराज भट्टले बताए ।

शुक्रबार मन्त्रालयमा पत्रकार सम्मेलन गर्दै मन्त्री भट्टले सचिवस्तरमा औषधि र कच्चा पदार्थ आयात गर्न आयातकर्तालाई अनुमति पत्र जारी गरेर सहज बनाउने सहमति भएको बताए ।

‘नेपाललाई आवश्यक परेअनुसार निर्यात गर्र्ने भारतीय पक्षबाट जानकारी आएको छ,’ मन्त्री भट्टले भने । मन्त्री भट्टले तीन महिनासम्म पुग्ने औषधि मौज्दात रहेको र नयाँ उत्पादनका लागि आवश्यक कच्चा पदार्थ समेत मौज्दात रहेको बताए । भारतले यसअघि ३६ वटा औषधिमा रोक लगाएको कुरा सार्वजनिक भएको थियो ।