कोभिड-१९ : ‘र्यापिड टेस्ट किट’ प्रयाेग गरेमा कारवाही हुने

काठमाडौं– स्वास्थ्य तथा जनसंख्या मन्त्रालयले ‘र्यापिड टेस्ट किट’को प्रयाेग गर्न रोक लगाएको छ। मंगलबार मन्त्रालयद्वारा आयोजित नियमित पत्रकार सम्मेलनमा बोल्दै स्वास्थ्य मन्त्रीका विज्ञ डा. खेम कार्कीले विश्व स्वास्थ्य संगठन र नेपाल सरकारद्वारा मापदण्ड विपरित  ‘र्यापिड टेस्ट किट’को प्रयाेग भएको भन्दै रोक लगाएको जनाएका हुन्।

विभिन्न स्थानमा कोरोना भाइरसको परीक्षण गर्ने भन्दै ‘र्यापिड टेस्ट’ गर्ने क्रम बढेपछि मन्त्रालयले रोक लगाएको हो । ‘र्यापिड टेस्ट किट’ प्रयाेग गरेको पाइएमा कारवाही हुने समेत उनले जानकारी दिए।

यसको साथै विज्ञ डा. कार्कीले त्यस किसिमको टेस्टबाट सहि परीक्षण नहुने भन्दै यदि कुनै व्यक्तिलाई र्यापिड टेष्ट गर्दा ‘पोजेटिभ’ देखिएर पछि ‘नेगेटिभ’ देखियो भने त्यो अवस्था भयावह हुने आपत्ति जनाए। उनले सरकारले तोकेको प्रयोगशालाबाट मात्र कोरोना भाइरसको परीक्षण हुने प्रष्ट पारे ।

हालसम्म १ हजार ६० जनाको कोरोना परिक्षण गरिसकेको मन्त्रालयले  जनाएको छ ।