काठमाडौं मेडिकल कलेजको अध्यक्ष बने सुनिल शर्मा

काठमाडौं– काठमाडौं मेडिकल कलेज पब्लिक लिमिटेड(केएमसी)को अध्यक्षको जिम्मेवारी सुनिल शर्माले सम्हालेका छन् । सोमबारदेखि शर्माले केएमसीको अध्यक्षको जिम्मेवारी सम्हालेका हुन् ।

मोरङस्थित नोबेल मेडिकल कलेजका सञ्चालक समेत रहेका शर्मा केएमसीको कुल सेयरको ४७.१ प्रतिशत सेयर खरिद गरेर केएमसी भित्रिएका हुन् ।

उनले केएमसीको संस्थापक सेयरको ५१.३८ प्रतिशत सेयर खरिद गरेका छन् । शर्माले केएमसीको अध्यक्षको पदभार गरेसँगै उनलाई सोमबार नै कर्मचारीमाझ अध्यक्षका रुपमा परिचय गराइएको थियो । केएमसीको २८ लाख ३१ हजार ६७ कित्ता सेयर शर्माले १ अर्ब ६९ करोड ८६ लाख ४० हजार रुपैयाँमा खरिद गरेका हुन् ।

काठमाडौं मेडिकल कलेज पब्लिक लिमिटेडको नाममा अहिले संंस्थापक ३ सय ५४ जनाको ७० प्रतिशत र सर्वसाधारण (कर्मचारी) ७ सय १८ जनाको ३० प्रतिशत सेयर रहेको छ । कुल ६० लाख ९ हजार ५ सय ५३ कित्ता सेयरमध्ये संस्थापकका नाममा ५५ लाख ९ हजार ५ सय ५३ कित्ता र सर्वसाधारणका नाममा ५ लाख कित्ता सेयर छ । जसमध्ये २८ लाख ३१ हजार ६७ कित्ता सेयर शर्माले खरिद गरेका हुन् ।