विराटनगर – विराटनगर – ७ स्थित अवधनारायण मेमोरियल क्लिनिकमा उपचारको क्रममा एक बिरामीको मृत्यु भएपछि तोडफोड भएको छ । पित्तथैलीमा भएको पत्थरीको शल्यक्रिया गरेको तीन दिनमा मोरङको बेलबारी नगरपालिका – ८ की ३२ वर्षीया सजना राईको मृत्यु भएपछि आइतबार मृतकका आफन्तले अस्पताल तोडफोड गरेका हुन् ।
मृतकका आफन्तले उपचारमा संलग्न चिकित्सकको लापरवाहीले विरामीको मृत्यु भएको आरोप लगाउँदै क्लिनिक तोडफोड गरेका हुन् । मृतकका आफन्तहरूले उपचारमा चिकित्सकलाई कारवाही गरिनुपर्ने माग राख्दै अहिले क्लिनिक अगाडी प्रर्दशन गर्दै आएका छन् ।
राईको पेटभित्र पित्तथैलीमा १५ एमएमको पत्थरी भएको गत २८ मंसिरमा भिडियो एक्स-रे गर्दा पुष्टि भएपछि चिकित्सकको सल्लाह अनुसार २८ पुसमा अवधनारायण क्लिनिकमा डा. निषेश सिटौलाको टिमले बिरामीका शल्यक्रिया गरेका थिए ।
अप्रेशनपछि स्वास्थ्य अवस्या बिग्रदै जाँदा राख्ने आईसीयू लगायतको सुविधा नभएको भन्दै सुनसरीको धरानस्थित वीपी कोइराला विज्ञान प्रष्ठिानमा रेफर गरिएकी राईको माघ २ गते निधन भएको थियो । त्यसपछि पीडितका आफन्तले शुक्रबार र शनिबार अस्पताल प्रशासनसँग बारम्बार मृत्यु हुनुको कारण माग गरेका थिए ।
क्लिनिक र चिकित्सकले मृतकका आफन्तलाई चित्तबुझ्दो जवाफ दिन नसकेपछि कारवाहीको माग राख्दै प्रर्दशनमा उत्रिएको मृतकका आफन्त छवि राईले बताए । बेलबारीबाट आएका पीडितका आफन्तको अस्पताल प्रशासन र अप्रेशनमा संलग्न चिकित्सक समेतको उपस्थितिमा वार्ता गर्ने योजनाविपरित ताला लगाएर सञ्चालक भागेपछि आफन्तहरु तोडफोडमा उत्रिए । तोडफोडबाट क्लिनिक झ्यालका सीमा तथा अन्य केहि सामाग्रीमा क्षति पुगेको बुझिएको छ ।
अस्पतालको सुरक्षाका लागि प्रहरीको बाक्लो उपस्थिति रहेको छ । पीडितका पक्षमा बेलबारीबाट सयौंको संख्यामा आफन्त तथा छर-छिमेकी विराटनगर आएका छन् ।
