रुपन्देहीमा सेनाले ल्यायो १ सय २० थान अक्सिजन सिलिण्डर

बुटवल-रुपन्देहीमा थप १ सय २० वटा अक्सिजन सिलिण्डर ल्याइएको छ । विगत केही दिनदेखि अक्सिजन अभावले समस्या उत्पन्न भैरहेका बेला शनिबार नेपाली सेनाले थप १ सय २० वटा अक्सिजन सिलिण्डर एयर लिफ्टमार्फत ल्याएको हो ।

शुक्रबार जिल्ला प्रशासन कार्यालय भैरहवामा बसेको जिल्ला सुरक्षा समिति, अक्सिजन उद्योगी र सरोकारवालासहितको बैठकले रुपन्देहीमा रहेका सबै अक्सिजन उद्योग र प्लान्टको व्यवस्थापनमा सेनाको सहयोग लिने निर्णय गरेको थियो ।

बुटवल धागो कारखाना प्रादेशिक अस्पताल र भीम अस्पताल भैरहवाका लागि शनिबार ल्याइएका सिलिन्डर प्रदान गरिने बुटवल उपमहानगरका प्रमुख शिवराज सुवेदीले बताए ।

यसअघि पनि रुपन्देहीमा सेनाको विमानबाट अक्सिजनका सिलिन्डर झारिएको थियो ।

बुधबारमात्रै अक्सिजन अभावमा लुम्बिनी प्रदेशभित्र १४ जनाको ज्यान गएको समाचार बाहिर आएको थियो ।