विराटनगर—मोरङको धनपालथान गाउँपालिका–६ कदमाहमा पब्लिक हस्पिटलले २५ शैय्याको अस्पताल सञ्चालनमा ल्याएको छ । रंगेलीका मनिसकुमार यादव र धनपालथानका पंकजकुमार यादवले २० लाखको लगानीमा बिहीबारदेखि सो अस्पताल संचालनमा ल्याएका हुन् ।
स्थानीयस्तरमा सहज रूपमा स्वास्थ्य उपचार सेवा प्रदान गर्ने उद्देश्यले हस्पिटल संचालनमा ल्याएको बताइएको छ । स्थानीयमा उपचारको सहज पहुँच होस् भन्ने उद्देश्यका साथ अस्पताल सञ्चालनमा ल्याइएको सञ्चालक पंकज यादवले बताए । ‘यहाँका स्थानीयले सामान्य स्वास्थ्य उपचारका लागि पनि पूर्वमा रंगेली र पश्चिममा कटहरी वा विराटनगर पुग्नुपर्ने बाध्यता छ । हामीले टाढा जानुपर्ने समस्याको अन्त्य गरेका हौं,’ उनले भने ।
अस्पतालमा ल्याब, एक्स–रे, इसिजी, युएसजी, फार्मेसी र २४ घण्टे आकस्मिकका साथै ओपिडीमा सम्पूर्ण सेवाहरु उपलब्ध छन् । अस्पतालमा हाडजोर्नी तथा नसा रोग, स्त्री तथा प्रसुती रोग, जनरल सर्जरी, मुटु रोग, बालरोग तथा नवजात शिशु, रेडियोलोजी र डेन्टल सम्बन्धी सेवाहरु समेत उपलब्ध रहेको सञ्चालक मनिसकुमार यादवले जानकारी दिए ।
गुणस्तरीय तथा भरपर्दो सेवा प्रवाहलाई दृष्टिगत गर्दै अस्पतालमा दक्ष तथा अनुभवी चिकित्सकद्धारा सेवा प्रवाह हुने उनको भनाइ छ ।
