गंगालालमा २० हजार ओपन हर्ट सर्जरी

काठमाडौँ–मुटु रोगको उपचारका लागि प्रख्यात सहिद गंगालाल हृदय रोग केन्द्रले स्थापना भएदेखि हालसम्म २० हजार बिरामीको ओपन हर्ट सजरी गरेको छ । २० हजार ओपन हर्ट सर्जरी भएको उपलक्ष्यमा अस्पतालले खुसीयाली साटासाट गरेको छ ।

नेपालमा मुटु रोगको निदान तथा मुटु रोगीहरूको उपचार तथा पुनः स्थापनाका लागि २०५२ सालमा स्थापना भएको यस अस्पतालले २५ वर्षको अवधिमा १९ लाख बिरामीको उपचार गरेको अस्पतालले जारी गरेको प्रतिवेदनमा उल्लेख छ ।

साथै, ८० हजार बिरामीको विभिन्न खाले क्याथ प्रोसेड्युअर र २५ हजार बिरामीको मुटुको शल्यक्रिया गरिएको अस्पतालले जनाएको छ । ९ शय्याबाट सुरु भएको यो अस्पतालमाले अहिले २ सय ३९ शय्याबाट सेवा दिइरहेको छ ।

ओपन हर्ट सर्जरीका साथै यस वर्षदेखि केन्द्रमा शल्यक्रिया नगरीकनै ४ वटा मुटुका भल्भ प्रत्यारोपण गरिएको छ । शल्यक्रिया नगरीकनै ‘ट्रान्सक्याथर इरोटिक भल्भ इम्प्लामेन्टेसन प्रविधिबाट मुटुको भल्भ प्रत्यारोपण सुरु भएको हो ।