एकीकृत स्वास्थ्य पूर्वाधार विकास कार्यक्रमको भौतिक प्रगति ९१.२७ प्रतिशत

काठमाडौं—एकीकृत स्वास्थ्य पूर्वाधार विकास कार्यक्रमको भौतिक प्रगति ९१ दशमलव २७ प्रतिशत रहेको पाइएको छ । वार्षिक स्वास्थ्य समीक्षा गोष्ठीको तथ्यांकअनुसार उक्त कार्यक्रमको वित्तिय प्रगति भने ८२ दशमलव ०२ प्रतिशत रहेको छ ।

सहरी विकास मन्त्रालयअन्तर्गत संचालित एकीकृत स्वास्थ्य पूर्वाधार विकास कार्यक्रमअन्तर्गत स्वास्थ्य पूर्वाधार निर्माण हुने गरेका छन् ।

समीक्षा गोष्ठीमा प्रस्तुत तथ्यांकअनुसार गत आर्थिक वर्षमा ३ अर्ब ३० करोड ८० लाख २ हजार वार्षिक बजेट रहेको थियो । जसमध्ये २ अर्ब ७१ करोड ५३ लाख ५२ हजार ७८९ रुपैयाँ खर्च भएको छ । यो वार्षिक बजेटको ८२ दशमलव ०२ प्रतिशत हो ।

जम्मा ७० वटा आयोजना सम्पन्न गर्ने लक्ष्य राखिएकोमा यो अवधिमा ६० वटा स्वास्थ्यका पूर्वाधार निर्माणका कामहरु सम्पन्न भएको सहरी विकास मन्त्रालयले जनाएको छ । जुन भौतिक प्रगतिका रुपमा ९१ दशमलव २७ प्रतिशत हो ।