सर्वोच्चद्धारा विपीका रजिष्ट्रारलाई आर्थिक तथा प्रशासनिक अधिकार दिन अस्वीकार

काठमाडौं–सर्वोच्च अदालतले विपी कोइराला स्वास्थ्य विज्ञान प्रतिष्ठानका रजिष्ट्रार प्रा.डा. सुर्यप्रसाद संग्रौलालाई प्रतिष्ठानको आर्थिक तथा प्रशाशनिक अधिकार दिन अस्वीकार गरेको छ । शुक्रबार सर्वोच्चका न्यायाधीसद्वय डा. आनन्दमोहन भट्टराई र टेकप्रसाद ढुंगानाको संयुक्त इजलासले अन्तरिम आदेश जारी नहुने फैसला सुनाएको हो ।

प्रा.डा. संग्रौलाले प्रतिष्ठानका निवर्तमान कायम मुकायम उपकुलपति प्रा.डा. प्रल्हाद कार्कीले आफ्नो प्रशासनिक र आर्थिक अधिकार खोसेको भन्दै सो विरुद्धमा अन्तरिम आदेशको माग गर्दै सर्वोच्चमा रिट दायर गरेका थिए ।

यसअघि प्रतिष्ठानमा निवर्तमान भिसी डा. कार्की र रजिष्ट्रार डा. संग्रौलाबीच कर्मचारी बढुवा प्रक्रियालाई लिएर बढेको द्वन्द्वमा कामु भिसी डा. कार्कीले डा. संग्रौलालाई प्रत्यायोजन गरेको आर्थिक तथा प्रशासनिक अधिकार फिर्ता गरेका थिए ।