भेरी अस्पतालमा आँखाको सर्जिकल सेवा सुरु

काठमाडौं—नेपालगन्जस्थित भेरी अस्पतालले आँखाको सर्जिकल सेवा सुरु गरेको छ । बुधबारबाट अस्पतालले आँखाको सर्जिकल सेवा सुरु गरेको अस्पतालले जनाएको छ ।

तीन वर्षअघि भेरी अस्पतालमा एउटा ओपिडी कोठाबाट आँखा विभागले सेवा दिन सुरु गरेको थियो । तीन वर्षपछि विभागले सेवा विस्तार गरेर सर्जिकल सेवासमेत दिन सुरु गरेको हो ।

अस्पतालका मेसु डा. प्रकाश थापा, पूर्व मेसुद्वय डा. पवनजंग रायमाझी र डा. बद्री चापागाईंको योगदानमा शल्यक्रिया सेवा सुरु भएको अस्पतालले आफ्नो फेसबुकमा उल्लेख गरेको छ ।

शल्यक्रियाका इन्चार्ज, बायोमेडिकल टिम र फत्तेवाल आँखा अस्पताललाई पनि विभागले कृतज्ञता प्रकट गरेको छ । ‘आगामी दिनमा यस सेवालाई थप प्रभावकारी बनाउँदै नयाँ सर्जिकल सेवा पनि थप्दै अगाडि लैजाने कुरामा पनि विश्वस्त छौं,’ अस्पतालले भनेको छ ।