मदन भण्डारी स्वास्थ्य विज्ञान प्रतिष्ठानको उपकुलपतिमा डा. ज्ञवाली

काठमाडौं—मदन भण्डारी स्वास्थ्य विज्ञान प्रतिष्ठानको उपकुलपतिमा डा. प्रदीप ज्ञवाली नियुक्त भएका छन् । बुधबार बागमती प्रदेश मन्त्रिपरिषद्को बैठकले डा. ज्ञवालीलाई उपकुलपतिमा नियुक्त गरेको हो ।

उपकुलपतिको कार्यकाल चार वर्षको रहेको छ । हेटौडामा रहेको मदन भण्डारी स्वास्थ्य विज्ञान प्रतिष्ठानका उपकुलपति नियुक्त भएका डा. ज्ञवाली नेपाल स्वास्थ्य अनुसन्धान परिषद्का पूर्व सदस्यसचिव हुन् ।

नवनियुक्त उपकुलपति ज्ञवालीले त्रिवि चिकित्साशास्त्र अध्ययन संस्थान (आईओएम)बाट एमबीबीएस गरेका छन् । उनले आईओएमबाटै फर्माकोलोजीमा एमडी गरेका हुन् ।

प्रतिष्ठानका यसअघिका उपकुलपति प्रा.डा. विश्वराज जोशीको कार्यकाल १५ साउनमा सकिएको दुई महिनापछि डा. ज्ञवाली नियुक्त भएका हुन् ।