आवासीय चिकित्सकहरुको निर्वाह भत्ता नतोकी सिट तोक्ने प्रक्रिया रोक्न माग

काठमाडौं–निजी मेडिकल कलेजहरुमा आवासीय चिकित्सकहरुको निर्वाह भत्ता टुंगो नलागेसम्म चिकित्सा शिक्षा आयोगले विद्यार्थी सिट संख्या तोक्न लागेको प्रक्रियामा स्वास्थ्यकर्मीका लागि सुरक्षित कार्यस्थल संघर्ष समितिले विरोध जनाएको छ ।

आवासीय चिकित्सकहरुको विषयमा आन्दोलन गर्दै आएको सो समितिले पछिल्लो समय आवासीय चिकित्सकहरुको निर्वाह भत्ता तोक्ने प्रक्रिया पूरा नभई आयोगले एमडी÷एमएस र एमडिएसका लागि स्व—मुल्याङ्ककन फारम स्वीकार गरेकोमा आपत्ति जनाएको छ ।

स्व—मुल्यांकन फारम स्वीकार गर्ने र निर्वाह भत्ताको सुनिश्चत नगरी प्रक्रिया आगाडि बढाउनु नियोजित भएको भन्दै आयोगका सह—अध्यक्ष रहेका शिक्षा र स्वास्थ्यमन्त्रीलाई ज्ञापन समेत बुझाएको छ । उसले चिकित्सा शिक्षा आयोगलाई पनि प्रक्रिया तत्काल रोक्न निवेदन दिएको छ ।

प्रक्रिया गलत भएको भन्दै गैरसरकारी (निजी) मेडिकल कलेजमा अध्ययनरत रेजिडेन्ट डाक्टरहरुले पनि विज्ञप्ति नै निकालेर विरोध गरेका छन् । साथै, विभिन्न कलेजमा रहेका स्वतन्त्र विद्यार्थी युनियनले समेत आयोगको सो कदमको विरोध जनाएका छन् ।